De Veldeke-Krink Mestreech is op goonsdag 19 november gestart mèt de promotie rond de verkoup vaan de "Nuie Mestreechsen Dictionair". Nao jaorelaank verzamele vaan Mestreechse wäörd is de redactie dr'in geslaag um 'ne nuien dictionair veur de "Mestreechter taol" same te stèlle.
't Book besteit oet twie onderdeile.
't Ierste deil is Mestreechs-Nederlands, 't twiede Nederlands-Mestreechs.
Zoe zal 't gemekelek zien um vaan de ein nao de aander taol euver te goon.
De spelling vaan 't Mestreechs is gebaseerd op de Veldeke-spelling.

Verkoup vaan aondeile:
Um zoe'n editie meugelek te make, gief de Veldeke-Krink Mestreech aondeile oet, die de weerde höbbe vaan 't nui book. Geer koup eigelek noe al 't book, meh geer krijg 't pas in oktober 2004. Geer huurt daan bij de allerierste kuipers.

Wie kinne néét-Veldekelede aon zoe'n aondeil koume?
't Aondeil kint geer kriege door veur 11 december 2003 (bijsjriefdaotum Veldeke) € 40,- euver te make op baankrekening 66.43.99.002 vaan Veldeke-Krink Producties te Mestreech.
Op zaoterdag 13 december 2003 kint geer daan, tösse 13:30 en 16:00 oor, terech in Hotel MABI aon de Kleine Grach um eur aondeil(e) aof te hole.
Dat aondeil gief in oktober 2004 rech op 'n exemplaar vaan de "Nuie Mestreechsen Dictionair".
Veer kinne uuch ouch 't aondeil thoes sjikke via de pos. In dat geval moot geer € 42,- euvermake (€ 40,- veur 't aondeil en € 2,- veur de koste vaan 't sjikke) op baankrekening 66.43.99.002 vaan Veldeke-Krink Producties te Mestreech mèt de vermelling "NMD" en de naom en woenplaots veur de inteikenlies. (Beveurbeeld Janssen. A.W., Oost-Maasrland).
't Aondeil weurt daan via de TGP-pos thoes gesjik.

E bezunder cadeau!
't Aondeil, gekalligrafeerd door Adriaan Beenen, blijf eigendom vaan de bezitter en is good te gebruke es surpries in de sjoon of es cadeauke oonder de boum.
't Aondeil is eve groet es 't book en kin later in 't book bewaord weurde.

De lètste kans um 'n aondeil te koupe is 30 aprèl 2004.
Wee veer deen daotum heet ingesjreve en betaold, weurt opgenome in de lies vaan inteikeneers achter in 't book. Alle inteikeneers kriege straks bij 't book nog get leuks.
't Reifelke aon eur aondeil gief uuch 't rech um in oktober2004 'ne nuie "Nuie Mestreechsen Dictionair" aof te hole. Boe en wie huurt geer daan nog via de Media.

Bron: Veldeke Krink Mestreech, maondag 24 november 2003