Ouch dit jaor organiseert de Veldeke-Krink Mestreech häör óndertösse bekind gewore "Vastelaovends-Cabbarèt". Onder 't motto 'CH MOOT EVE DROET! späölt de veldeke-cabbarètgroep veer aovende achterein in de Bonbonnière. En zoewie gebrukelek zal ouch dit jaor de "gewoene" Mestreechteneer weer centraal stoon.

De lede vaan 't cabbarèt, Taos Brounts, Phil Dumoulin, Jan Janssen, Els Ottenheym, Gwenny Tomassen, Twajn Weijenberg en Will Wintjens stoon weer garant voor 'nnen aovond "HEL LACHE". Zie weure daobij begeleijd door 'n muzikaal combo bestaonde oet Ben Perry (piano), Frans van Vliet (móneka), Roger Weijenberg (gitaar) en John Westenberg (slaagwerrek).

't Vastelaovends-Cabbarèt zal plaotsvinde in de Bonbonnière op goonsdag 11, donderdag 12, vriedag 13 en zaoterdag 14 fibberwarie. De kaarte kóste 11 Euro per stök en zien verkriegbaar bij De Kiekoet in de Hègkestraot en OPTIMAAL Roel Vossen in de Wieckerbrögkstraot.