Naomens Kengkee punt nl winse veer Prins Luc I vaan harte perfisia! Leve Mestreech, Leve de Mestreechter vastelaovend! Vastelaovend same!
Naomes de gezameleke ministeries vaan:
Opgekläorde en Veurgeliechde zakes
Gepeersdrökde zakes
Protocol en Euvergekookde zakes
Mestreech, 9 jannewarie 2005
Op dizzen importanten daag , tot d'n aonluip naor de Vastelaovend definitief zien beslaag heet gekrege ,deile veurnumde Ministeries gruuts mèt , tot de Vastelaovend
2005 ziene veurmaan heet gevoonde in de persoen vaan Luc I dee mèt belump
en vaste hand de stad zal goon regere in de zwoer meh plezerege daog vaan Vastelaovend.
In 't börgerleve steit d'n Hoegen Hoeglöstigheid bekind oonder de naom Luc Schoonbrood en heer resideert same mèt echgenote Margriet en de twie kleinste , Cas en Maud , aon d'n Hertogsingel boe heer ouch gebore is zoe'n 39 jaor geleie.
Tegeliekertied bestiert heer vaanoet dat adres zien zaak HB Travel Touringcarbedrief Luc Schoonbrood , veur welk bedrief heer oonlangs nog 'ne prestigeuze pries in oontvangs moch neume. Dudelek tot 'n aontal vaan zien titels daor naor verwieze. Gepok en gemazeld in 't Vastelaovendsleve woort heer es kleine jong al euveral mètgesleip wat later rizzulteerde in muzikaol oetspattinge es dikkezjiemis en tubaspeuler bij Herremenieke Obbenuijts, dat es traditie heet :'t begeleie vaan 't Mooswief naor de Vriehof . 'n Aander groete leefde vaan häöm is MVV boe heer ziech jaorelaank heet ingezat veur de sympatisante club. Tegeliekertied hèlt heer ziech bezeg mèt tennis en is wezeloos geïntrèsseerd in Formuul I racerij. 'ne Inkele kier begief heer ziech mèt keu en ivore balle op 't greun lake bij Brands Beerhoes um kompetitie te speule. In e gries verleie heet Ziene Hoeglöstigheid ziech bekwaomp in de edele kuns vaan 't koke euver de grens in't Miewenès. Es mins dee ouch de allegatie vaan de reiswereld mèt de paplepel kraog ingegote heet heer ouch nog 'n aontal jaore functies oetgeoefend veur KLM en Excel, euveriges neet ieder es naotot heer mèt vräög en succes zien opleidinge had aofgemaak aon oonder aandere de Apekeutelesjaol aon de Pestoer Habetsstraot, 't Stedelek Lyceum aon de Eenhoornsingel en diverse cursussen oonder mie aon de Erasmusuniversiteit en in Brussel.Op organisatorisch gebied heet heer zien spaore verdeend , door ziech in te zètte veur de stiechting VOU (vrun oonder us), 't Platoost, ( vereiniging vaan oondernummers en aajd-studente vaan de Hoege Hotèlsjaol Mestreech) en es organisator vaan de Orïentatietocht Maastricht veur 't gooje doel.
Bron: http://www.tempeleers.nl, 9 januari 2005. |