Vendaog is Pol Brounts in Mestreech gestorve. Heer is 85 jaor gewore.

Brounts waor actief es sjrijver en es zoedanig betrokke bij de Mestreechter Dictionair en de Mestreechter vertaoling vaan de straotnaombördjes in 't centrum vaan de stad. Heer oontvong veur zie werk oonder mie de Fons Olterdissen pries.

Brounts waor in de jaore '60 en '70 'Nónk Pol', de presentator vaan 't Jäögprogram vaan de ROZ indertied. Heer maakde in totaal 446 aoflieveringe vaan dit program.

Veer dingke trök mèt werm herinneringe aon 'Nónk Pol'. Heer waor altied bereid um us vaan advies te veurzien es veer eve neet wiste wie de sjuste Mestreechter vertaoling vaan e woord waor.
Mestreech moot 't noe doen zoonder de nestor vaan de Mestreechter taol. Heer zal vaan op zie wölkske oplètte tot veer daog zègke en neet däög, heer zal touw kieke en zörge tot veer eus sjoen Mestreechs neet verlore laote goon!

'Nónk Pol' adie !