In dit Dictionairke vaan 't Mestreechs stoon wäörd, oet drök kinge en gezègk des die in 't Mestreechs wat veer alle wijl in eus stad spreke nog dèks weure gebruuk.
De beteikenisse weure geïllustreerd door middel vaan complete Mestreechse zinne. De spelling die in dit Dictionairke weurt gebruuk is de officieel spelling vaan 't Mestreechs, die in 1999 door Börgemeister en Wèthawwers is vasgestèld. Ze is door Pol Brounts en Phil Dumoulin besjreve in hun book Speulentere Spelle (1992) en ze weurt ouch gebruuk in De Nuie Mestreechsen Dictionair (2004).
Bij 't make vaan dit Dictionairke stoonte miech twie doele veur ouge. Iech wouw op de ierste plaots de vocabulaire vas lègke dee karakteristiek is veur 't Mestreechs, wie dat aon 't begin vaan de 21e iew in eus stad weurt gesproke. Iech wouw wijer 'nen dictionair make dee gemekelek in 't gebruuk is, neet allein veur lui die verstand höbbe vaan taol, meh ouch veur lezers die veur taolkundege kwesties gein belangstèlling höbbe. Grammaticaol informatie is um die reie tot e minimum beperk. Dit beukske is op de ierste plaots gesjreve veur Mestreechtenere die nog Mestreechs spreke en die ziech veur hun taol intressere. Meh 't is ouch bestump veur 'Hollenders' die gere get euver 't Mestreechs wèlle wete.

Veur mier informatie of um dit beukske te bestèlle kint geer loere op: www.onderweg.info