Gesjreve door: Jan Coumans, Piet Geelen en Joop Kurris

Rijstartele of Veters?, zjus wie Speulentere Spelle in 1992 gepubliceerd, is 't twiede deil vaan de liergaank euver 't Mestreechs. Góng 't ierste deil euver de spelling, in dit deil ligk de naodrök op de grammatica en de vocabulair. Rijstartele of Veters? is primair gesjreve veur de jäög, veural veur de lèsse Nederlands op sjaol en es inleiing tot 't Mestreechs veur neet-Mestreechtenere.

In dit book stoon twelf tekste, die allemaol in 't Mestreechs zien gesjreve. Tien vaan die tekste zien veurzeen vaan vraoge mèt betrèkking tot teksbegrip en vaan commentaar op grammaticaol punte, op foute die Mestreechtenere make es ze Nederlands spreke, op de spraokklaank vaan 't Mestreechs en op de meujlekhede die neet-Mestreechtenere oondervinde es ze Mestreechs wèlle liere.

Väöl veurbeelde oet de grammatica vaan 't Mestreechs weure in dit book aon de orde gestèld. Gezeen 't lezerspubliek wat de sjrijvers veur ouge stoont, maag me neet verwachte tot al die punte tot in detail weure besjreve. Toch is 't commentaar soms aon de korte kant. Dat beteikent tot de lezer wel interessante veurbeelde krijg geprizzenteerd, meh tot heer dèks zelf moot zien oet te vinde wat de regels zien.