Zesde klas lieger sjaol. Bijj de broeders aon de Breusselsestraot. De ganse klas zow 't koer zien veur de nachmès met Keersmès in de paoterskèrrek. Sjiek. Die groete jónges ( de hoegste klas vaan de sjaol ) zowwe wel ins get laote zien en veural laote hure ! Ederein mós metdoen en d'r woort in d'n tied vaan de gewoen lèsse gerepeteerd. Iers in de klas en wie de meziek al
get beter drin zaot in de kloesterkapel vaan de broeders.

Heer had al vanaof de ierste klas e roondoet besodemieterd punt veur zeenge op ziene bulletin. Sóms 'n zès min, meh miestal 'n veer. Dat hóng aof vaan de kwik. D'n eine naom zeenge en ziechzellef erreg serieus, d'n aandere stoont get blijjer in 't leve. In dit geval hoofde heer neet solo veur de klas te zeenge en aof te goon, noe veel 'r neet op in e koer vaan zeker dertig maan
en kós 'r mèt genete vaan 't succes. Want dat zoeget nog noets ieder door onbekinde amateurs waor gebrach, daovaan zow nao aofloup ederein tot wied boete Mestreech euvertuig zien.

D'n druim doorde neet lang. Al bijj de twiede repetitie stopde de broeder 't zeenge en leet 'n stilte valle. 't Leek wel of d'r gein ind aon kwaom. Meh ouch of ederein wis wat ging koume. " Ik wil dat dat gebrom achterin ophoudt ". Dadelik veroonderstèlde heer dat 't op häöm sloog . En ouch dat vaan mètzeenge niks mie zow koume. Zow dat beteikene dat 'r neet mie bijj 't koer kós blieve en in de keersnach neet mèt kós doen ? 't Zweit stoond in zien han. De broeder deeg zien errem
tergend langzaam umhoeg en dirigeerde weijer. 'r Wis 't neet zeker meh 'r had 't geveul dat niemand nao häöm gekeke had en dat niemand wis dat 't um häöm ging. Ging 't wel um häöm ? In oonderdeile vaan 'n seconde besloot 'r gein eenkel risico mie te neume. Play back en loch happe, doen es of !

De bewuste keersnach kwaom en 'r waor nog altied vaan de partij. Oondertusse had 'r af en tow al weer 'ns veurziechtig geprobeerd get geluid met de beweginge vaan ziene mónd te laote ontsnappe, meh dat leet 'r toch weer vlot achterwege. 'r Voond 't zellef eigelik aoch neet um aon te hure en 'r kós daobijj aoch väöl minder verstoon vaan wat die aandere zoe sjoen zónge. 't
Woort 'n prachtige mès met väöl Latien. En mèt hollandse keersleedsjes die neet gerepeteerd waore en door de ganse kèrrek woorte mètgezoonge. Heer kós die leedsjes vaanzellefsprekend vaan thoes boe heer wel gewoen mètzóng, vaan zien ma die hiel sjoen kós zeenge. Dus deeg heer oet vol boors mèt. Dee neve häöm stoont loerde af en tow 'ns oet 'nen hook vaan 'n oug, meh daodoor leet 'r ziech neet "vaan de wijs" breenge, zoegezag.

Wie de mès aofgeloupe waor ging 't koer door 'n lange gaank nao e zäölke veur koffie en bruudsjes met gekookde sjink. Ederein waor blijj en heer voolt ziech erreg opgeluuch. 'r Waor toch nog hiel get geluid kwiet gewoorde. Opins voolt heer 'n stevige hand um ziene bovenerrem. De broeder
trok 'm oet de rijj en zag mèt e breid lachend geziech: "Je hebt schitterend gezongen, een extra krentebol heb je wel verdiend". Toen 'r um veer oor in de vreuge mörrege in bed laog, naom heer ziech veur um later toch 'ns get met zeenge of aandere meziek te goon doen.
't Woort 'ne Zaolige Keersmès

Mestreech, december 2003
Jean Jacobs

PS: Jaore later - heer waor pas getrowd - stoond heer oonder 'n dampende douche en zóng oet vol boors zoeget wie de Marseillaise of de Brabançonne. Opins kwaom zien vrow sjaterend binne: "Iech wis neet dats diech zoe'n gooi stum höbs. Allein,... bij die teks huurt wel 'n aander wijs. Wijjer kleenk ' t good !
" Verrek, dach 'r, iech höb zin in 'ne krentebol !"