Slenterend en aof en tow nao oonder kiekent , leep Jules door de Groete Staat. 'T waor kaajd en vochtig weer. In de kinderköpkes spiegelde de kiekoete alles wat oetgestald stoond. Oetgestald . De Keersdaog . De daog boe väöl lui nao oetloerde . Veur häöm hoofde 't neet zoe. Opkiekend zaog heer al dat sjoens dat ziech in de straot weerspiegelde in wèrkelijkheid. Watste allewijl neet allemaol kins kaope . Teminste este de duite daoveur höbs. Heer in eeder geval neet. Levend vaan 'n oetkiering beteikend zuinig zien. In zien hoes stoond allein 't hoegnudige en nui kleier koch heer pas es de kringlaop winkel niks mie had wat häöm pasde.
Ouch ,ns lekker oet ete zaot t'r neet in. En oetnudigingen kraogste ouch al neet in zien situatie. De kraag vaan ziene aofgetrampelde palto hoeger optrèkkend en z'n han deep in de tesse , slófde heer wijer . De lui rende häöm veurbij es of zie geine tied hadde. Tasse vol kemissies mètsleipend . Die wèlle weer gouw naor hoes . Lekker werm en gezèlleg met e glaas wien of e good book d,n aovend doorbringe. Heer bleef 't liefste zoe lang meugelek op straot . Had heer teminste ouch lui um ziech. Ze zagte wel niks tege h'm . Meh toch…….
Snakkend naor 'n tas koffie leep heer de Vroom in. Mieljaar , wat waor 't sjoen gewore. ' T heet gèt mage koste. En dat allemaol um de lui nog mie aon te zètte um nog mie te kaope. E pläötske boven in de restauratie aon de roet , gaof häöm de kans um op de lui "neer te kieke" Neet lètterlek natuurlek . En umgedreid , este lui naor bove loerde, keke ze tege h'm op. Veur Jules 'n apaarte ervaring.
Heer knäöpde z'ne palto los en naom 'ne slók vaan z'ne koffie.
"Vindt geer 't good es iech aon eur täöfelke kom zitte "? Jules keek op . "Meh zeker mevrouw " zag heer gauw. " Zèt uuch" 'N neet oonknappe vrouw vaan roond de veertig hông häör kemissietas aon 'ne stool en gong tegeneuver h'm zitte. " Vies hè menier , boete " " Zegk dat wel ". " Oonder 'n zonnebaank binne is 't noe beter verblieve es oonder ,ne perreplu boete " zag heer vruntelek. Eve veel 'n stèlte. " Ne mins moot toch gèt metmake " verbraok ze 't stèlzwiege. " En ouch nog zoe vlak veur de fiesdaog " gong ze wijer. Ze had duudelek behoofte aon e gesprek . " Miene maan is pas gestorreve" "Plotseling"? vroog heer belangstellend. "Och nein menier , 't is 'n crieme gewees . Veur miech meh veural veur häöm ! Noe is heer gelökkig op zien plaots. Zoe zeet 't cliché teminste . En iech haw miech dao mer aon vas " Ze nipte 'ns aon häöre koffie en Jules zaog dat ze nate ouge had. "Heer heet 'n prachtige begrafenis gehad. Eederein waor dao." " Meh och , iech bin uuch oongemerk aon 't opzadele met mien probleme " " Vertelt meh röstig door mevrouw . 'N probleem of verdreet weurt dèks kleiner este 't kins deile mèt 'ne aandere." Gerösgesteld gong ze wijer mèt vertèlle. Gaondeweeg 't verhaol aonluusterend voolt Jules ziech allein mer gelökkiger weurde. Wat had dat mins 'ne haop elend mètgemaak. Daan liever minder kezjem . Heer booj häör ,n tas koffie aon. Ze sloog 't aonbod aof. "Bedaank dat geer höb wèlle luustere. D'n hoond is allein en es dat te lang doort kin iech dalek goon dweile " Ze pakte häör tas en deenblaad, winste Jules plezerige daog en leep naor d'n oetgaangk. Heer zag nog "vaan 't zelfde mevrouw" en wis tegeliekertied dat 't bij 'ne wins zow blieve….. Terwijl heer z'ne palto touwknuipde stoond heer op en vertrok ouch. Deep weggedoke in ziene kraag , leep heer door de fiestelek verseerde Kleine Staat en Wolfstraot naor 't Slevrouweplein. Heer bleef eve stèl stoon bij de Keersstal dee boete op 't plein waor opgezat , veur dat heer de Slevrouw binneleep. Dee Keersstal dat moos noe eigelek de kiekoet zien boe de lui zich aon zouwe mote vergape. En ziech mooste aofvraoge of al dat materieële wel opwoug tege 't levesgelök. Gezoond zien en 't materieel minder höbbe is dat neet belangrieker ?
Heer leep de kapel binnen , haolde 25 eur.cent oet z'n tes en staok e keerske op. Die vaan 50 cent waors get te deur. 'T zal toch neet zoe zien dat Slevrouw minder verhuringe deit veur 25 daan veur 50 cent. !! Neet alles is in geld oet te drökke , dach heer trök aon die oonbekinde vrouw in de Vroom. " Zaoleg Keersemes" zag heer bijnao hel op en slenterde riechting hoes.