'N NUI MESTREECHSE CD! - INKEL MESTREECH(s)

't Heet eve gedoord, meh oeteindelek ligk ze noe toch in de winkelrekke. De CD vaan Will Wintjens en Phil Dumoulin mèt d'n titel Inkel Mestreech(s).

W ee 'ne trouwe bezeuker is vaan de cabarèt-aovende vaan de Veldeke Krink Mestreech zal 'n aontal vaan de nommers beslis al ins gehuurd höbbe. 't Is 'n boonte verzameling vaan versjèllende soorte leedjes. De twie zengers, Will Wintjens (bij de mieste lui nog altied bekind vaan "Rommedoe") en Phil Dumoulin (bekind vaan o.a. 't Mestreechs Volleks Tejater), zinge op dees CD alletwie in hunne eige stijl. Will is de maan vaan de franse klaanke (o.a. Jacques Brel) en geveulege tekste en Phil sjrijf op bekinde en minder bekinde melodieë tekste die 'ne kritische invalshook höbbe of soms ech nörges euver goon!

Op initiatief vaan Jan van de Water, directeur vaan de Nutsbedrieve Mestreech, zien de nommers oeteindelek op CD gezat. In miert vaan dit jaor woort 't album opgenome bij Studio A Recordings in Stein. De twie zengers woorte daobij begeleid door 't vaste combo vaan 't Veldeke cabarèt: Ben Perry (piano), Frans van Vliet (móneka) en Roger Weijenberg (gitaar).

D'n titel "Inkel Mestreech(s)" is 'n woordspeuling. Es thema veur dit album is gekoze veur 'n "Inkel Reis Mestreech". Dat weurt metein dudelek es me op de väörkant loert. 'n Speciaol veur deze CD oontworpe treinkeertje (neet vaan ech te oondersjeie) boe-op aongegeve weurt tot 't geit um 'n inkel reis vaan Mestreech Centraal nao Mestreech Randwyck. Mesjiens steit dit stiekem
wel e bitteke symbool veur de chauvinis dee neet weier kump es zien eige stad. De "s" is d'r achter geplak umtot alles op en in de CD in de Mestreechter taol is gemaak. In 't beukske vint g'r zelfs de tekste vaan alle leedjes zoetot g'r ze mèt kint zinge!

't Oeteindeleke rizzeltaot maag mèt rech professioneel geneump weure. 't Is zoewie me dat zeet, 'n echte luuster-CD. Vaan 'n hoeg fees-gehalte is daan ouch zeker gein sprake. En mesjiens is dat ouch wel wat dit album op dit momint zoe uniek maak. Oet betrouwbare bronne is vernome tot zelfs d'n hier A. Rieu zier te spreke waor euver 't rizzeltaot, en dat wèl netuurlek get zègke. Al mèt al moot gezag weure tot Inkel Mestreech(s) 'nen echte aonraojer is!

"Inkel Mestreech(s)" is te koup op de volgende adresse en kos 14,95 Euro.

Music Plus - Amorsplein
Enjoy Your Life - Achter 't Vleishoes
De Kiekoet - Hèggestraot
VVV - Kleine Staat

Bron: Roger Weijenberg, 18 oktober 2004