't Waor 'ne prachtege zomer, zjus wie dit jaor, toen veer in Rothenburg ob der Tauber waore.
Dat is op de kaart ´n twiestare-attractie aon de bekinde Romantische Strasse bij de Duitse naobers. ´t Kort verblief waor ´n oonderbreking vaan ´n reis nao ´t Wijer Ooste boe d´n Donau haos zoe sjoen is wie de Maos, in de naoventrint vaan boe ech ´t hart ligk vaan Gerard van Rens.Veer waore dao op aonraoje vaan e paar Mestreechse vrun um de exploitatie vaan de vestingmör vaan dit sprookjesdörrep mèt eige ouge te zien.
"Missjien 'n idee veur Mestreech?", dat waor de oonderzeuksopdrach.
De wèts neet watste zuus!
E decor zoe groet es pakweg Valkenburg ob der Geul, allemaol pliesterwerrek gesjèlderd in pastelkleure. Sjiek en Sjoen koste hei wel oetgevoonde zien es ze neet vaan us waore.
En in die scène de klöch vaan 't daagtoerisme. Petikskes mèt souvenirs, traditioneel kleijerdrach en horeca mèt de massa. Meh veural ( en noe de trompötte ) Die Rothenburger Weihnachts-Werkstatt und fünf Weihnachts-Fachgeschäfte von Käthe Wohlfart, ganzjärhlich geöffnet, jawohl.
Ouch hei: De wèts neet watste zuus.
'n Onveurstèlbaar massa keerskitsch. Verseringe, stare, balle, keersgróppe, meules in nog groeter aontalle es de Japanners die ziech dao tussedoor vrikgde en in vol kalbasse de peperdeure reli-kitsch wegsleipde. En dat in 't midde vaan de zomer.
"Bei uns ist es immer Weihnachten", zoe zag 'n moonter Trachtlerin.
De wèts neet watste zuus..
Keermès, in´t veurjaor, in de zomer, in´t naojaor en vaanzellef ´ne joekel vaan , ´ne keersmerret in november en december.
Missjien ouch get veur Mestreech in de stèl maonde ?
Bewaor miech, ezzebleef!

Iech waor verleie week bij de slachter. Zoe ´ne echte slachter mèt väöl vleis en wienig branchevreemde aw kloete. En daan, opins midden in de zomer geverfde eier op de winkelbaank. Wie iech kinnelek naodrökkelek nao de eier loerde woort miech mèt e lechske gevraog wat iech dach. Iech dach dat die eier zoe lang nao de Paose neet al te fris mie kóste zien, ouch al waore ze gekook. Mis, hartstikke mis! ´t Waor e leuk idee um bij gelegenheid vaan de zomer carnaval paoseier te verkoupe...
Iech moot geloerd höbbe es of iech de pieringe hoort hooste in Egypte. De ganse witte brigade sjaterde het oet vaan plezeer. Hiel eve dach iech aon 'n fóf boevaan iech de kloe neet snapde en vergaot toen ´t veurval.
Tot.. iech e paar oor later op d'n tv ein vaan de vieftigdoezend herhaolinge vaan de lokaal dörrepspoomp zaog. Zoonder ouch mer ein waarsjouwing veuraof woort lösteg gekakeld dat 't de koumende zoondag op de Kesselkade carnaval zow zien, zomercarnaval !
De wèts neet watste huurs !
Die nach höb iech zwoer gedruimp: Mestreech, ein groete scène mèt vastelaovendswinkels, kaffees, in november vastelaovend, in de winter vastelaovend, in de zomer vastelaovend of carnaval, 't gans jaor door.
Sintervaos, Lei, in naom vaan de Mestreechter Vastelaovend, bewaor us, ezzebleef !

Mestreech, juli
Jean Jacobs