't Waor good. De veurbereidinge höbbe hun vröchte(km-ers) aofgeworpe. De Nach vaan Gölpe ligk al weer achter miech.Zwoer dit jaor.Dat wel. Mer ouch oergezèlleg.Ederein heet mer ein doel veur ouge. De eindstriep nao 70 km laope(wandele is get aanders) hole. D'r weurd gezoonge en gelache. Get wat naomaote de toch vordert netuurlek aofnump. Oonderweeg waor vaan alles te zien. Inins duuk in 't duuster landsjap ‘ne vuurspeier op. Sjiek um te zien. Daan weer steit e böske langs de weeg mèt meziek en groete sjerme die via ‘ne webcam de luipers laote zien veur datste de zoeväölste heuvel opkretse.Ze zègke dat Limburg gein berg heet mer heuv els . Iech kin uuch mètdeile dat nao de zoeväölste heuvel , ‘ne weegdörpel ziech al es berg aondeend. De Eysenerbosweeg, de Kruusberg bij Wahlwiller en de Keuteberg zien ech gein jonges boeste vaan zègks , die pak iech eve. Nein zie pakke diech. 't Praote en lache verstomp zoe gauw es veer de ierste meters ‘bergop' höbbe aofgelag. D'r zien ‘rs ouch die doorpraote. Zoevaan ; Huur miech ‘ns ! Wat loup geer toch te kuime? Later in de nach zuuste ze neet mie trök………

App els en appelesene oonderweeg en op de groete rösplaotse, koffie,thee,sop en frisdraank en bruudsjes mote deveur zörge dat de liechaamshoeshajding op peil blijf. Este get tekort kumps ligk dat ech aon dichzellevers. De organisatie is fantastisch.

De tas mèt spölle , um dich um te kleie en te verzörge, vinds gelabeld trök op de groete rösplaotse.

't Waor geweldeg um te zien wie de jong gaste zich door de nach begaove. Niks in de kroeg of d'n disco. Nein ‘lekker' laope.Soms zaogste aon de liechaamstaol dat 't tösse de sok en de vootzool neet mie zoe waor es wie ze vetrokke . Pitsende oetstölpinge belètte hun um nog gewoen te laope. Mer ze zatte door ouch al zaote ze de door.!!

Ouch kumpste es luiper d'r achter , este dat al neet wèts, dat de lief veur 't groetste gedeilte oet water besteit. Este dat neet mèt drinke op peil hèls , höbs de kans dat op e gegeve momint allein nog sjeun, sokke, korte brook , t-shirt en pet zich euver s'Herenwegen begief. . De res is “verwaterd”!

Same mèt de jongste kleinkinder Fleur en Peer höb iech de leste meters hand in hand aofgelag. E geweldeg geveul um dat same mèt hun te doen kin iech uuch vertèlle .Alle ‘sores'vaan die nach verdween in hun hennekes .

't Waor dit jaor m'n 5 e nach.Veur eder jaor dat iech op deez eerd roondtaffel höb iech eine km aofgelag. Daobij had iech gevraog um die km-ers of 'n aontal daovaan , te sponsere. “t Bedraag dat dat op geit bringe weurt euvergedrage aon 't Ronald Mc. Donaldhoes bij 't AZM. Dao blijf niks aon de striekstek haange want dao höbbe v'r André R. veur . Sjeun, en verzörging is betaold. Dus…

Dao zörge vrijwèllegers deveur , oonder leiding vaan 't management(ech Mestreechs woord), dat awwers boevaan e keend dat in 't AZM 'n medische ingreep moot oondergoon, kort bij 't keend kinne zien. Evt. mèt breurkes en of zusterkes. 'n Prachtige instèlling die wel get cent kinne gebruuke.

Veur miech ‘ne extra stimulans um De Nach vaan Gölpe oet te laope.En wie gemeld. Dat is gebäörd. Meu mer voldoon gaon “iech en die vaan miech”(Leuke naom veur ‘n operètte) op fietsvekantie. Hopelek höbbe v'r daan ouch sjoen weer. Zoe neet ?