Los vaan 't feit dat zoeget es, hoonderd persent örgens good in zien, wel besteit en nao 't zien vaan 't gelieknaomege programma oppe tilleviesie , gaon iech toch 'ns perbere oet te vèsse wat dat noe eigelek is . Hoonderd percent Sjeng.

Es iech in de Slevrouwe kèrk bin begint 't al. Dat Sjeng zien. Iech veul miech umermp door de pilasters. 't Dao zien allein al gief miech 't geveul vaan diech bis Mestreechteneer. Es daan ouch nog 't Sterre der Zee-leed weurd gezoonge bij fiesteleke gelegenhede laope miech de sjevraoje euver mie lief. Hinnevel maak dat ziechbaar..

Veur miech 't ultieme Sjenggeveul.

Laopend door de binnestad, boete 't toeristeseizoen, euverkump miech dat ouch. Es iech ougcontak höb mèt lui zègk iech " goojendaag ". Of iech ze noe persoenlek kin of neet ; Iech zègk goojendaag. Dèks krijg iech 'nen wins trök in mien riechting. Mer soms ouch neet. Daan zal 't geine Mestreechteneer zien is mien veroontsjöldegende gedachte daobij. Krijg iech wel e vruntelek "goojendaag"of "besjoer" trök, bekrup miech dat thoesgeveul- zègk mer Sjengegeveul- weer.

De "Servaos" mèt al zien devoties, percessies, 't kèrkgebouw, de nao häöm geneumde fanfare, bouwvereineging, en de heilegdomsvaart. Ze zien in 't leve vaan 'ne Sjeng neet weg te dinke. Es heer de naom allein al huurt flits 't door ziene kop ; Dat is de petroenheilege vaan de stad boe de Sjenge woene. Iech dus ouch....En 't leed "O St.Servatius, besjermer vaan Mestreech" vèlt wie 'n werm deke euver häöm heen, es dat gezoonge weurt.

De Merret. Sinds kort is ederen daag weer eder steintsje vaan de vloerbedèkking te zien. Es geine merret is teminste. 't Stadhoes steit in volle glorie midde op dat plein monemint te zien. E bake in de stad este eve de weeg kwiet bis. En dat kump bij 'ne Sjeng nogal 'ns veur. Veural es heer op stap is gewees..Op die plek stoon de bösse en taxi's die häöm weer nao zien hoonk trökbringe. Nao nog eve e lèste pèlske gedroonke te höbbe in eine vaan de väöl te gezèllege kaffees....Dat Sjenggeveul.

Daan de Vriethof. Dee nao de renovatie vaan de parkeergraasj, oonder dat magnefieke plein, op deezelfde Vriethof de Perroen neet heet gemis, is geine Sjeng. Oetgeslote. Deginnege dee vindt dat 't euvergeverf zaat herremenieke aon de voot vaan de monumentaole gebouwe sjoen is , is dat daan ouch geine Sjeng ? En zal dee/zie 't noets weure ? ." Leuk veur 'ne foto, mer daan höbste 't ouch gehad". Zeet dat d'n echte Sjeng euver dat te boont gezèlsjap ? Zsjus wie heer ; Preuvenemint zeet en neet Preuvenement es heer 't euver dat-speciaol veur Mestreechtenere oets begonne- hepkesfies, heet mèt 'ne Hollender.

Minckelers, Olterdissen, Regout, D'Artagnan, Dibbets, vaan Oppen , Kemp , Veldeke, de Piele Hameleers , Paoter Vink, Charles Vos en gaank zoe mer door , waore ouch neet allemaol Sjenge.Mer de Sjeng huurt ze wel te kinne.Iech vraog miech daan ouch aof watste noe ech oonder 'ne Sjeng moos verstoon?

De conclusie moot zien , dink iech ;

Sjeng zien is e geveul. Dat höbste of dat höbste neet. Heer/zie heet de sjariteit hoeg in 't veendel stoon. Heer/zie sprik Mestreechs. Neet bekak mer trèk 't laaaaaaaaaank. Vindt 't erg dat de aw stad weurd aofgebroke mer liet 't gewoen gebäöre . Dat de lui ziech neet mie oonderein goojendaag zègke vindt heer/zie versjrikkelek. Behalve mèt vastelaovend .Daan doen ze ' dat wel. Dat vind heer/zie magnefiek Es kaffees slete mèt de vastelaovend kint heer/zie neet verdrage. Wèlt heer get ete , . geef häöm mer Reijts. Geine MC Donalds. It gein "patatje oorlog" mer friet mèt sajs.

Es 't pèlske oonbetaolbaar weurt moot heer jenke. Heer/zie pak ziech e bijbäöntsje um dat te kinne blieve betaole.

Zingk 't Mestreechs volksleed oet volle boors en hèlt 't daan neet druug. Riggelaote,sjot els plak,röchelpötsje,hinnenejjer, junkerke ,kazjeweel, knópsjinkele, kónkeleflouze, masklummele, in zien vocabulair heet. En zeet ; "Huur die klökskes 'ns pinkspummele" es heer/zie die klökskes huurt lojje.

Devaan oet geit dat ederein häöm versteit. Löp liever euver de Aw Brögk en neet euver de Hoeg.

Plas neet wèld ...mer rösteg. Zit gere neve zien väördeur te klajsjenere mèt zien naobers. Kretsje beer debij.

Kump neet op veur zichzellevers mer liet dat aon d'n Hollender euver.. Geit mèt zien akkefietsjes nao Slevrouw.

Blijf kèrk tege de twie basilieke zègke.Begint op Asselegoonsdag nao te dinke euver 't vastelaovendspekske veur 't volgend jaor. Knöp rijstartele en gein veters. Vind huidsvleis oet de kuns.

De bovestaonde lies vaan kinmerke vaan 'ne (volgens miech) echte Sjeng is netuurlek väöl langer Nog ein gegeve zouw iech hij wèlle touwvoge ;

ES NEET-SJENG WEURSTE GEBORE

MESTREECHTENEER BISTE AL NEGE MAOND VEUR DEEN TIED...........