Herremenie väörop de kemuniekinder d'r achteraon. Videokamera,s doen hun wèrk in de han vaan euverieverege opa's of daoveur ingeheurde noonkes. De flitse vaan fotokamera's al of neet digitaal, zörge veur zwarte vlekke op 't nètvlies en blieve dao nog e tiedsje" naozitte". De kameralui bewege ziech ev els es professionele SBS-ers , in de processie. Alles moot jummers vasgelag weure. "Is heer neet groet in dat pèkske", huurste 'n langs de lijn geposteerde tant nog gruutser es de awwers , tege noonk zègke. "Wat e prachteg kleidsje"heet ze aon vertèld e nisjeke tege häöre vrund. Dee lètste maag veur d'n ierste kier 't femiliefies mètmake bij zien vriendin thoes. "Heet häör mam zèlvers gemaak" "Jao sjoen"is zien reactie. Heer is mie bezeg mèt wie 'r strak zal weure oontvaange door häör femilie. De kinder boe 't um geit op zoe'nen daag, laope e bitsje sjeigelend in de rij. Zoeväöl aondach brik de concentratie um sjoen achterein te laope. Daobij rope de" vaslègkers " hunne naom , um ze neet en profile mer froontaal in beeld te kriege. Sommege kinder blieve op verzeuk eve stoon, um hun noonkes en opa's de kans te geve sjerp te stèlle. "Good zoe "is de beloening veur zoeväöl begrip. "Doorlopen" 't komando vaan de begeleidende juffrouw. De herremenie mèt voltalleg bestuur, d'n hoegen hood in de hand mèt de zwarte heise, späölt de meziek dat bij deez gelegenheid pas.
De vraogs dich aof wat zich in die kinderköpkes aofspäölt. Eigelek is dat gein vraog. Es ze strak in de kèrk perceis höbbe gedoon wat hun tijdens de veurbereiding op de 1 e kemunie is gelierd geit daonao 't fies beginne. De kadoos vlege hun um de oere en de amveloppe in pa z'n tes. Veiligheid gegarandeert. Es zich weer 'ne gulle gever aondeent weurt de naom vaan de feesteling es 'n kèttingreactie gescandeerd of e zusterke/breurke is zoe good um de oondergedokene op te spore. Dee is gaow gevoonde. Es 't kado in wat veur 'ne vörm daan ouch in oontvangs is genome, weurt de strategische opstèlling weer ingenome. Achter de geheurde voetbaltaofel, in d'n knutselhook of achter de tillevisie mèt computerspäölselke. Is väöl leuker daan al dat gepuuns en koonstant mote hure vaan : "En, höbste ouch daanke gezach"?.........
"Krijg oma geine poen"? "Vindste 't sjoen"? "Hadste toch gevraog, he"? "Este 't al höbs kinste 't mèt mam goon ruile. Zie heet de bon" "Biste noe al weer sjips aon 't ete ,strak itste neet. En dat vind mam neet leuk . ze heet twie daog aon ein stök in de keuke gestaande"!De wèls es kemuniekant op dienen daag niemand dweers zitte. Zeker d'n awwers neet. Dat zien de lui die , dat wat allemaol op dich aofkump höbbe georganiseerd. En 't bringk diech es fiesteling toch ouch hiel get op !.Good gevölde amveloppe, digitale camera, stereo-installatie , bedelèrmbendsje, gouwe kètting, voetbaloetrösting, DVD-speuler, DVD's , CD 's en num mer op. D'n tied vaan tas en sjotel, printsje, kèrkbook, gegraveerd zèlver bestek, sjoen-sjrief-sjrif mèt of zoonder völpen ligk al weer wied achter us. Noe steit prominent de mountenbike in de sjeur te wachte.
Dat is wat de kinder bezig hèlt.Ze waore vreuger neet anders es noe. Allein laog de lat neet zoe hoeg. Um contiuniteit te geve aon wat in de kèrk en daoveur gebäörd is zouwste es awwer toch 'ns get dèkser nao die kèrk mote touw goon mèt de kinder. Daan kriege ze de kans um hun käös te make. Wèl iech dat of wèl iech dat neet? Mer um noe direk te stoppe mèt kerkgaangk naodat de tente, de buffètte , de beertonne en sjot els vaan 't kaajd buffèt zien trök gebrach. De foto's en video's zien bekeke en de kadoos hun plaots höbbe gevoonde in de kinderkamer is toch wel erg straf. En absoluut neet de bedoeling vaan 't oontvaange vaan de 1 e kemunie.
Este pas de rijbewies höbs gehaold en de geis veur d'n ierste kier de weeg op, allein, daan veulste de aofwezigheid vaan d'n instructeur. De bis allein , de moos situaties zelvers insjatte en daonao handele. De hölp dieste vaan d'n intructäör höbs gehad is daan hiel väöl weerd...
Iech zouw zègke. In dat verband ;
't Fies is pas ech aofgelaope en kompleet euver 'n paar jaor es de kinder begeleid zien nao 't zelfstandig kinne dinke en handele.Door hun awwers. De lui die 't fies georganiseerd höbbe en de riechting höbbe aongegeven.......toen.