Maonde hadde veer oetgeloerd nao 't konzèr vaan André Rieu.'t Vriethof waor umgebojt tot 'ne riechtege "platte zaol" mer daan ooneuverdèk. De prachtige gebouwe roondum woorte aongeleech um ein en aander nog mie cachèt te geve.De buim ervoor iech es decor boe-achter edere momint de maestro mèt zien orkes teveursjijn kós koume.En wie veer vaanoet de Groete Staat door de hèkke lepe en de konzèrzaol betroje bekroop miech mer weer 'ns 't oonwoersjijnlijke geveul vaan 'ne oetgesproke chauvinis. Wat kin 't Mestreechteneer zien toch geweldege effecte höbbe op 't geveul.'t Woort ouch nog versterk door de beelde op groete sjerme mèt d'n teks "euzen André" d'rop. "Sjus good", dach iech. Zoeget höbbe ze dao-bove neet! Vaan d'n aandere kant vroog iech miech aof , wee 't lef heet gehad zich dee gooje mins touw te eigene....
Nao de openingstouwspraok woort 't ederein dudelek dat 't neet allein um de meziek gong. 't ZDF maakde opnames vaan 't konzèr en dus moos op komando geklap weure , aongespäörd door de maestro, midd els e henneke dat de beweging maakde vaan; "kom op laot uuch hure" En dat is aon us Mestreechtenere wel besteid. Toen veer, muzikaal, de Vriethof op en neer beleefde landde 'ne straoljaoger op 't podium. Althans 't geluid dat oet de speakers kaom suggereerde dat. Andrè zellevers sjrók ziech ziechbaar 't laplazerus, mer späölde professioneel wijer.Toen 't stök waor aofgelaope, bewoog heer ziene kop riechting linker revers , vaan dao-oet had heer mèt ederein dee bij de organisatie betrokke waor verbinding en vroog (neet in Rudy Carrel Duits!!) , boe de oorzaak laog vaan dee neet in de partituur stoonde geluids-oetbarsting."Van de slagwerkers" kloonk 'n stum euver de Vriethof. "Moet zeker overgespeeld worden" ? waors André's reactie. En hup dao gonge veer weer "De Vriethof op en neer". Muzikaal daan wel weer..Sinds de renovatie had 't ouch op 'n aander meneer gekind, mer dat woort bewaord veur later op d'n aovend.
't Technisch hoogstandje , boe-in (euze)de stadsbeiaardierachter de colisse verdween en daonao op 'n Don Camillo-echtege meneer op zien fietske langs de Sintervaos vloog, te voot de trap oprende en oetgepöt achter ziene mèt marionètte-note oetgeröste klokkespeul neerzeeg., is oonvergetelek.
Concerto de Aranjuez höb iech al hiel dèks beluusterd , mer zoe oetgevoerd nog noets.'n Staonde ovatie kraog de alweer op de Vriethof "neergedaalde" stadsbeiaardeer vaan o.a. de Sintervaos.
Es daank moch heer nog 'ne kier trök nao de klokketories um de "Limburgse Klokke te laote "loeë".Dit nao de vraog vaan de baas"Boe zien klokkespeul hong "? 'n Ope deur dach iech...
De zengers en zangeresse die hun stumme euver de stad Mestreech mochte oetdrage, boe-oonder 'n Mestreechse, doge dat geweldeg. Nao 'n aontal veurgeprogrammeerde "zoegabes"moch Benny Neyman "zien"Mestreech promote. E bitsje " blow vaan 't dörp", dink iech, zat heer " Kom met me mee naar Maastricht, voor wie niet weet waar dat ligt"..in. Benny kom noe! Noets vaan d'n Euro gehuurd, vaan Börger Leers, vaan de sjoenste stad, vaan e strand zoonder water, preuvenemint mèt extra groete glazer,en hiel klein hepkes te betaole mèt hiel klein lepkes die groete portemenees leeg make.....en gaangk zoe mer door. Dee dao nog neet vaan gehuurd heet is toch zeker wereldvreemp....
Chapeau veur ,ne gezèllege Mestreechsen aovend dee us nog lang zalblieve heuge. Dat zeker. En es geer dink , nao dit geleze te höbbe, "wat 'ne zawweleer, daan höb geer geliek. Oeteindelek bin iech Mestreechteneer in hart en nere en dao huurt ensele en zawwele noe einmaol bij.
Dré(veur zien vrun en dao huur iech nao de Vriethof ouch bij) bedaank en laot us neet te lang wachte op de DVD........