Hiel laanksem kroop kabouter Sjuulke oet zie blaaierbèdsje. Op de rand vaan e bleedsje zittend,loerde heer door 't vinsterke vaan ziene paddestool. Mamma had de gerdijnsjes al ope gesjuif. De naober vaan Sjuulke, de merel ,dee in de pereboum zien nèske had gebojd, zaot al op 't vinsterbenkske. Heer floot zoe sjoen zien leedsje, dat Sjuulke dao good wakker en tegeliek vruntelek vaan woort.

Mamma en pappa hadde häöm belaof dat ze vendaog nao de biestenhoof zouwe goon.Wat had heer ziech dao-op verhäög. Heer had vaan alles oet 't bos en oet de neve gelege wei verzamelt, boemèt heer de bieste kós vore. Boswiemele, eikelkes en bromele. Oonder de bleedsjes voond heer ouch nog aomzeik-eikes. Dao laogen 'rs zoeväöl, de aomzeike zouweaomzeik gaaroets neet in de gate höbbe es heer e paar vaan die eikes mètnaom .

Al dat ete had Sjuulke in e eikeboum- blaad gedreid um mèt te numme.

En dao gonge ze op weeg nao de biestenhoof. Gemekeleker gezag daan gedoon. Pap had e kebouter-otoke veur hun inein gefisternölt .Die kinste jummers nörgens kaope en gaangk dao noe mer 'ns mèt de otobaon op. Geine mins dee hun zouw zie . Zoe klein waor dat dingk.Dus had heer häöm gans geel geverf.

Pap wèrkde ziech oonderweeg nao de biestenhoof 'n oongelök um neet örgens tegenaon te bótse of oonderin te rije. Hiel veurziechteg reej heer um de pötdeksels zoedat ze neet door de spleten in de pöt zouwe valle. 't Zweit stoond 'm op ziene kop. En ouch op de kop vaan Mam en Sjuulke.

Nao 'n eurke rije en sjeigelentere vaan links nao rechs kaome ze daan toch gezoond en zoonder oongelökke aon op de parkeerplaots vaan de biestenhoof . Pap parkeerde euzen oto oonder 'ne paddestool vlakbij 'ne boum " Daan waor heer strak neet zoe wèrm es ze nao hoes gonge"zag pap..

't Oto-rije waor al neet zoe fijn gewees en 't betaole aon de kassa gong ouch al neet vaan zellevers.. Dee waor jummers vöäl te hoeg . Aon kebouters die hij op bezeuk kaome had hij geine gedach. Hel ropend en wegduukend veur de sjeun vaan de groete lui, mochte ze eindelek binne in 't kentuurke betaole.

Toen de biestenhoof in. En wat ze dao zaoge waor oongeläöflek. Hiel väöl lui, groete en kleine, en

hie-ie-iel groete bieste.!! Op de kouwe hónge bördsjes boeste op kós leze wie die bieste hèdd en boe ze vandan koume. Mer ouch weer väöl te hoeg veur hun, um te kinne leze. Sjuulke wis wel wat 'ne giraf en 'ne lieuw waor. Dao had heer en Pap en Mam gein bördsje veur nuudeg .Heer had ze wel 'ns op e printsje gezeen. Mer noe in 't ech waore ze toch e flink stök groeter. De lieuw , dee had tan zoe groet es Sjuulke zellevers waor. En de giraf had 'ne nek, boevaan heer 't ind neet kós zien .Zoe laank waor dee .En vraoge aon aander lui wie de res vaan de bieste hèdde en boe die vandan kaome kóste ze aon niemand vraoge.Sjuulke trok al ins aon de brookspiep vaan e jungske. Mer dee kredste ziech 'ns aon zien bein en leep wijer.

Sjuulke en ziene Pap en Mam doge niks aanders es opzij springe. Eders kier es Sjuulke nao bove loerde, zaog heer d'n oonderkant vaan 'ne sjoon op ziech aofkoume en moos heer gauw wegduuke anders treide ze op 'm.. Loerde heer opzij, rolde groete raajer langs ziene kop, vaan kuitskes boe ze klein jungskes en meitskes in roondrijde. Ouch braoke Sjuulke en zien Mam en Pap bijnao hunne nek euver de olieneutsjes en stökke vaan groetelui-botramme die euveral laoge.En mèt 't mètgebrach voor vaan Sjuulke kóste ze ouch al niks. Die bieste die hij zaote aote allein mer appels en pere of bananen.. Wie Sjuulke 'ne appel in 'n kouw zaog ligke rappeleerde heer ziech inins dat heer 'ns 'ne appel op ziene kop had gekrege wie heer mèt zien vrundsjes waor aon 't speule.In 'n wei. 'ne Bölt zoe groet wie e klein eppelke had Sjuulke daovaan euver gehawwe. Sinds deen tied löp heer allein nog mèt 'ne helm op door de wei. En mètnumme hij nao touw? Dao waore ze väöl te zwoer veur.

Meh miene jong, wat veel dee biestenhoof tege !! De lui en zeker ouch de bieste, zaoge hun nog neet 'ns stoon...Zoe'ne biestehoof is niks veur kebouters dao waore ze noe wel achter. Dee waor allein veur groete lui en kinder...

Noa väöl gespring en wegduuke zaote ze doedmeu weer in d'n oto en kaome gelökkeg zoonder oongelökke weer veileg thoes.

't Ierste wat iech gaon doen zag Pap vaan Sjuulke, 's aovends veur 't nao bèd goon, is; zörge dat hij in de buurt 'ne biestenhoof kump boe kebouters gezèlleg nao touw kinne .Veer goon hokke en kouwe make veur spinnekes, vleegskes, vlinderkes, mögke, bije, slivvenhierebieskes en nog völ mie vaan die prachtege bieste. Dat moot hij in 't bos koume. Daan kinne veer en alle aander kebouters ,dao nao touw laope en höbbe dao gein las vaan de groete lui D'n oto höb iech daan allein nog mer nuudeg um voor te hole en spölle um hokke te bouwe.. Joepie , reep Sjuulke toen heer 't huurde en doog ziene pyama aon . Dat gaon iech mörrege tege mien vrundjes vertèlle. .Pappa nog eve knuffele." Iech höb de leefste Pap vaan alle kebouters" zag heer ." En dao bin iech hiel gruuts op."

Mamma brach häöm nao zien blajerbèdsje oonder 't daak vaan de paddestool en puunde 'm goojenach. "Mamma ", vroog Sjuulke stèllekes , "zouw Pap dat ech doen"? "Meh jong" zag mam, "es Pap get belaof, deit heer dat ouch, dat wètste".

't Doorde mer eve en Sjuulke sleep wie 'n roes en druimde vaan ZIENE biestenhoof................................same mèt zien vrundsjes

ZOE ZUUSTE MER . 't IS DèKSER VAJERDAAG IN E JAOR ..........