Kin dat ? Jao dat kin. Mer daan allein in Heugem " 't Dörp gelege aon Moojer Maos. En allein in 2006. Herremenie (opgeriech es famfaar) St. Michaël besteit 100 jaor. En wie 't leve toen geleef woord lete ze zien in 'e dörp in e Dörp.

De klokke vaan de gelieknaomege parochie-kèrk loide. Kèrkgengers oonderweeg nao de drei-hiere mès oonder e straolend zönneke. Oonderweeg woorde veer al geconfronteerd mèt taferele die de rappelatie aon 't jaor 1906 mooste oprope. De sjaolmeister heel mèt straffe hand mèt dao-in 'ne straffe stek e sjaolkleske in 't gareel.Aof en touw kaom dee stek kletterend neer op e sjaolbenkske ester neet gedoon woord wat volges de meister gedoon moos weure.Koum dao noe mer 'ns veur hoort iech roondum mich."Meh jong"zag iemes" daan weurt d'n errme mins veur 't gerech gesleip" En mèt die opmerking waor 't "baorebinde"begonne.! Ouch de berbeer begós mèt 't aonkleie vaan zien selon. En op 't kèrkplein woord alles in gereidheid gebrach . Dao waor 'Zaoterdags al 't Rochusbeer aongeslage en dao waor de res vaan de Zoondag 't episch centrum.

'n Drei-hieremès in de St. Michaëlskèrk compleet mèt Gregoriaanse zaangk ,'ne acoliet en mèssedeenders. Menier pestoer mèt bonnèt, wierook en 'n stampvol kèrk, bezat door veurnaomelek in kleierdrach oetgedoste mennekes en vruikes op sjiek . Dat alles waore de väörbodes veur 'ne magneprachtegen daag . De boetestäönders beloerde ziech dat es-of Heugem bezeuk had gekrege vaan boete-eerdse wezes D'n roondgaank vaan d'n H Rochus sloot 't kèrkelijk gedeilte vaan 't ieuwfies aof.

Tösse de kraome op 't kèrkplein koum dich de walm vaan gebakke spek mèt ei al tegemoot. Vermengk mèt de reuk vaan koffie, mooste wel touwgeve aon wat 't water oet d'ne moond aongaof. Happe dus.... Heerlek. Ouch 't baorebinde kraog aon taofel e vervolg. Toen menier pestoer mèt ziene collega (pastor vaan de Vinkeslaag) bij us aon taofel kaom zitte veulde veer us 'n echte 1906-er.. Ze hadde d,n toog aon , mèt die zenew els echtege knuipkes en de , veur deen tied oonaofsjeideleke sjèrp um de- toen miestal umvaangkrieke- boek en de bonnèt op.

De roondgaangk door 't dörp 1906 brach us bij de bèkker, mèt lekker vlaoj trouwens, bij de mooswiever, de waswiever( iech vin este die vaan 't moos zoe numps daan die vaan de was ouch...) , 't gong mer door.

't Dörpsgeziech; Baorebinders verzameld roontenum e täöfelke boe-op zjus plaots genóg waor um de flesse sjnaps te kinne neerzètte. 't Rumerke zaot geklemp in de voes en woord regelmaoteg , soms get te regelmaoteg, bijgesjöd.

Tijdens de wandeling mooste veer eders kier opzij springe. Daan veur de door peerd getrokke struu-wagel, daan veur de beerkaar mer ouch - en dao gong 't toch allemaol um - veur de toen nog Famfaar St.Michaël. Achter ziech aon de rij-dansende bevolking vaan Heugem. Magnefiek. 't Boereleve, de boerebroelof, de geweldeg geimiteerde kaffee Penders . Este dao aon Bachus geofferd hads en de zougs 't neet mie zitt kóste geliek bij d'n doejegrever nao binne..... Euveral waor aon gedach. De smeed , mèt zien door hel wèrke en sleeg geve mèt d'n hamer op 't iezer opgezwolle polse, dwoong respek aof . Zien produk bezörgde 't op 't erf "geparkeerd " peerd nui hoofiezers. Prachteg um te zien en de reuk vaan 't inbrandend iezer te ruuke. De sjrienewèrker zat ouch zie bèste bein väör en de sjoester doog dat zingentere. Nog eve bij de sjlachter langs mèt zien druuglèdder en tiene-oettrek-apparaat veur de verkes. En jeh, oonvermijdelek op zoe'nen daag ; op nao 't buffèt. Dao woorte de sjoenste rappelaties door de - veurnaomelijk- Heugemenere opgehaold. Es 't verhäölselke neet woord geluif woord d'n oongeluivege mètgesleip nao de fototentoenstèlling um de wäörd vaan de vertèller te bekrachtege. Wouwste debij hure kóste dao enpassent nog 'ne foto in aw kleierdrach laote make.

Dat waor Heugem 1906.

Is väöl veraandert ? . Jao dat is 't. De prachtege gereidsjappe gebore oet de vindingriekheid, weure neet mie gebruuk. D'n tied bringk dat noe einmaol mèt ziech mèt. 't Baorebinde geit noe miestens via de computer

Este vreuger roed haor hads of 'n bitsje euverbedeilde neus, flapoere hads of maank waors, waor dat miestal boe de lui dich mèt aonduidde. Dat waor neet koed bedoeld, mer wel gemekelek. Zoe hoort iech aon 't buffèt tijdens 'n coversatie tösse twie manslui ; " De kins toch zeker Huub vaan Harie vaan de roeie Sus ? Dee mooste kinne "......... "De bedo els toch neet de zoon vaan Harie vaan Merie vaan Beik ?" Nou gaangk dao mer aonstoon. Kin neet mie.

Trök oonderweeg nao hoes woord iech weer geconfronteerd mèt e versjèl tösse d'n awwe en nuie tied. Sjievelde iech in 't "aajd dörp" oet euver de peerdskeutele (ouch die droge hun steintsje bij aon de sfeer) gebäörde miech dat in 't huidege dörp euver de gestruide motorolie......Laanksem storf 't geluid vaan de belle vaan de dörpsumropers weg.

D'r is e tillevisieprogram dat altied eindeg mèt de wäörd ;

" DIT WAS DE ANDERE TIJD , TERUG NAAR DE ONZE " En zoe voolt dat ouch........