Begint 't al te kriebele ? Veult geer al get ? Te laat, te laat. 't Had al mote kriebele. D'r hadde al sjevraoje euver eure rögk mote loupe bij 't hure vaan 't nui Vastelaovendsleedsje zoe tösse de sop en de knien. Of ieder nog ; tösse de peperneut en de marsepein. Iech höb al Sinterklaoze gekleid gezeen in de kleure roed geel en greun. 't Keersmenneke had ingehaold mote weurde op 'ne vastelaovendswagel en in plaots vaan Hoo'Hoo , Alaaf , Alaaf mote rope.'n Zaate herremenie deveur . Geer kint dat wel. De herders in de krib hadde veer mote verkleie es keuninge en de keuninge es sjäöp. Achter d'n os en d'n ezel stiekem e veetsje Bavaria keul mote lègke. (of Brand of Grolsch) Gein balle in de boum meh beervèltsjes. Op taofel de kalkoen of de knien mote vervaange door tètedevaux en in de plaots vaan bitterkeukskespudding, 'ne pot zoer hieringe op taofel mote zètte. En es piek in de boum , 't Mooswief.

De aw vastelaovendsleedsjes hadde de Keersleedsjes mote vervaange. Mèt 't Dreikeuningeleed es toenzetter veuraof. In dialek netuurlek. Um 't gehiel good in stumming te bringe waors 't aon te bevele gewees um ev els in de keuke en in de "gooj" kamer e buffèt op te zètte. Ouch 't verkleie in 'ne Keersmaan had geer neet mage touwstoon. Jummers eder häögenis aon dat figuur had geer nao d'n achtergroond mote sjuive.

In de plaots vaan d'n ingel waors 't misjien leuk gewees um 't bördsje "tapvergunning"op te haange aon't stelke. De wijze vastelaovendsvierder ,oonderweeg, kós daan beter de weeg vinde nao "zien" stelke." Steerkes" zuut dee jummers al genóg en dao waor altied plaots.En moch geer d'n ingel te zier misse waors 't misjien aon te raoje d'n Ingel vaan Mestreech in te heure en dee es e soort vlegende kiep tösse de buffètte te laote "vlege"

Daan höbbe veer nog de cortège. E kuitske veuroet duie dat geit nog , meh e kribke weurt al get meuileker. En de awwers mèt kriege is oonder die umstendegheid ouch neet mekelek. Dus dreie veer 't um.

De femilie die mèt zoe'n daog toch bij de mieste lui kompleet present is (jaomer genóg neet euveral), trèkke in e soort rijaloet langs boum en krib en mage ziech nao aoflaop, dwz , ouch d'n hoof en de gaangk bij 't gehiel betrèkke, ziech e pèlske hole bij d'n Ingel.

En veer späölde nog lang en gelökkeg...?

Bèste lui geer begrep wel dat bovestaond gebazel is. Eder fies heet zien weerde veur 't volk. Allein este in October in de winkels al Keersbuim zuus en in November mèt Vastelaovend weurs geconfronteerd , mèt Sinterklaos de ierste Keersbuim aon de maan of vrouw weure gebrach, mooste toch eve de weeg kwiet rake en sjödde v'r veur 't gemaak alles meh eve doorein.Is 't neet jummers noe al zoe dat de gekleurde eier ouch al stèllekes op de toenbenk ligke.....? Gelökkeg allein nog mer in de vastelaovendskleure.!

MIENE WINS VEUR 2005 ; EDEREIN ZIEN EIGE FIES en ALLE FIESTE OP DE GEëIGENDE PLEK !

En veur uuch ;

'ne ZAOLEGE vastelaovend op 6-7en 8 Fibberarie....en geneet vaan alles wat dao-tösse ligk.