|
|
|
Kóntak |
|
|
Euver Kengkee |
|
|
Bronne |
|
|
Favoriet |
|
|
|
|
|
Opa
Jam Vertèlt Archief
|
|
|
|
Merie
en Joezep
|
Wee
kint ze neet die twie op d'n ezel. Dat wèlt zègke:
Merie d'r op en Joezep deneve. Ze hadde 't lesteg. Merie waor jummers
oetgetèld en daan is verveur op zoe'n sjogkelend bies noe
neet 't plezeigste middel um vaan A nao B te koume. Meh in deen
tied hadste nog gein VOM-böskes. Dus wat wèlste!
Joezep slófde op zien sandale de neve op. Ouch heer kós
gein beroop doen op Nikes, um 't ziech get gemekeleker te make.
Wie daan ouch; ze mooste nao Bethlehem. Naodat ze op versjèllende
plaotse te hure hadde gekrege tot gein plaots waor, kaome ze op
e plekske boe meinigein tegenswoordeg z'n koont tege aon goejt.
Zjus, bij de krib.
't Is evels alweer zoe'n 2003 jaor geleie! Meh toch, wee kint 't
verhaol neet? Al is 't allein umtot vrij daog deveur gegeve weure
of umtot 't daog zien boe 'n gaanse bosfauna-populatie euver de
taofels vluig. De herte, reeje, fezante, haoze, knijns (zoe wie
grameer ze maakde mèt peperkook en sjroep) en zwijne, num
mer op, baoje in hun sejskes. E gleeske wien zörreg deveur
dat ein en aander soepelkes z'ne weeg vind.
En daan de keersverhaole zellevers; menier pestoer vertèlde
op sjaol of tiedens de preek op 1e keersdaag, perceis zoe wie 't
indertied gebäört moot zien. En de versies vaan Pa en
Ma of Grameer en Grampeer. Bij die verhaole in hoeseleke krink woort
't ein en aander altied gelardeed mèt sjnie. Hiel väöl
sjnie. En netuurlek mèt stare. Die jummers straolde hun leech
oet euver 't eerdse en de lui die ziech dao op bevoonde. Neet allein
um mèt hun oetstraoling de weeg te verleechte zoedat eederein
z'n bestumming kós/kin vinde meh ouch in figuurleke zin.
Sommege luikes op deez planeet höbbe 't noe einmaol gemekelek.
Evels 't groetste gedeilte neet! Dat 'STARELEECH' kinne zie good
gebruuke. Zeker es dinger neet goon zoe es ze gewèlt of gehoop
hadde. Daan zien veer blij dat veer vaan dat 'STARELEECH' mage en
kinnen gebruuk make en de weeg dee ze móte goon neet allein
weurt verleech meh ouch verliech.
De las dee 'ne mins mót drage kinste dèks neet inins
vaan z'n sjouwers aofhole. Dragelek make kin altied. Daan wèt
deeginnege ziech gesteund en dat is al hiel get.
Niemes is gebore um allein te zien. Ouch neet in eelend. Laote veer
daan dat 'STARELEECH' zien, die die verliechting brink. 't Keersverhaol
vaan Grameer en Grampeer of Pa en Ma is daan neet allein 'n sjoen
herrinering! Meh 't is ouch begrepe.
Euverigens; gezèllige Fiesdaog mèt väöl
STARELEECH en laot uuch de knien in 't zoer lekker smake! Want dat
huurt netuurlek ouch debij........!
|
|
|