Good gemöts en getas gong iech 29 Sept. 't aofgeloape jaor weer 'ns op weeg nao sjaol. Eve voolt iech miech weer de koejong vaan vreuger. Toen lag iech de weeg naor de Martinussjaol in Wieck al blikske trampend aof. Soms waor 'ne kiezelstein de klos. Noe waor 't evels anders. Op miene leeftied deit me dat neet. 'T kin wel, mer dat zuut neet oet......Iech gong trouwens ,aongepas aon d'n tied, noe mèt d'n oto. In 't lokaal vaan de sjaol , boe iech oongetwiefeld weer get slummer zouw weurde, waore mien geliekgestumde al aonwezeg. Bördsje vaan pepier veur dich op taofel mèt de väörnaom en 't fies kós beginne.
En e fies waor 't, kin iech uuch vertèlle.
Mevrouw Bartels , de docente, vertèlde al vaan 't begin aof, vol euvergaof en enthousiasme euver de Historie vaan Mestreech.
80 Milioen jaore geleie is 't sjeins hij euverstroomp gewees en nao stijging vaan 't groondoppervlak kaom Zuid Limburg bove water. Wiste veer geliek boe de oetdrökking "bove water koume " vaandan kump.
De jaore gonge veurbij en laanksem aon woort ein en aander bewoent.
En toen gong 't gebäöre. Wee toen allemaol hij in de buurt en ter plaotse kaom woene , hèltste neet veur meugelek. Dao zouw de minister vaan intregatie vaan noe absoluut geine raod mèt gewete höbbe .Zoe-es dao waore :.Bandkeramiekers, Hunebèdbouwers, Klokbekervolk , Kelte of Galliërs en de Eburone. Zij hadde gein asylaonvraog nudeg. Ze doge of hun neus blooide en gonge op of in de melleger woene en langs 't water. Dat späölde ziech wel aof op 4000 jaor tot 300 jaor veur Slivvenhier zien "ter eerdebestèlling" (vaan-oet d'n Hiemel gezeen) plaotsvoond. Dus 't sjoot al lekker op.
En of 't nog neet genòg waor , dachte de Romeine en Fraanke, wat die kinne, kinne veer ouch. Allein waor 't toen neet zoe wie noe.Veer leve vendaog de daag in 'n multiculturele sameleving zoe wie dat hèt. Gelökkeg mer. Want indertied verdreef d'n eine d'n aandere. Niks intregere !!
Nao hiel get keuninge en mechtege Heilege Vaders (Pa's) allemaol mèt hun eige gesjiedenis en verhaole wijer ,kaome veer bij de Bisjoppe vaan Mestreech.
"Monnie en Gonnie" waore de koosnäömkes vaan eus "juffrouw" veur d'n H.Monulphus en Gondulphus. De twie die rammelentere vaanoet Mestreech nao Aoke lepe um de ope gebleve zitplaotse vaan d'n Dom in Aoke te bezètte. Rammelentere umtot ze dat es geraomte invölde zoedat toch alle steul bezat waore. Get wat Karel de Groete tijdens zien bisjoppeconferentie gere wow.
Dat soort verhaole zien de sajs op de eerappele. Ederein genoot vaan die meneer vaan lès geve.
Nao hiel get oorlogen en intriges, die teikenend zien veur de ieuwe boe-in ze plaots voonte, kaome veer terech bij Regout. Pa waor neet zoe'ne slechte höb iech begrepe , mer zien zäöns höbbe behuurlek de kachel aongemaak." Haw diech ze stom ,haw iech ze erm ", waor 't motto.
Ouch dat is door de strijd, dee d'n arbeider mèt geliekgestumde leiers heet oetgevochte, allemaol good gekoume.
De gesjiedenis vaan d'n 1e wereldoorlog boe-in Nederland en dus ouch Mestreech good devaanaoaf is gekoume en d'n 2e dee versjrikkelijke gevolge ouch veur Mestreech en veural z'n inwoeners heet gehad, waor 't sjluutstök vaan 't verhaol vaan Mevr. Bartels dat bijnao vief maond heet gedoord.(eine kier in de week)
"t Geit te wiet um de hiele cursus hij oet de deuk te doen. Alleriers zouw miech dat gaaroets neet lökke, vaan d'n andere kant wèl iech d'n hoop oet spreke dat mie Mestreechtenere ziech verdepe in de historie vaan eus / hun stad. En es ze oets 'ne kier 'n leidende of beslissende rol speule in de Gemeinteraod, wel of neet aofbreke vaan al dat sjoens wat eus/hun veurvajers en mojers höbbe achter gelaote,of gedeiltes daovaan , die beslissing altied oetvèlt in 't veurdeil vaan die lètste en dus vaan us.!
Stadshistorici die us, eus kinder en kleinkinder euver al dat sjoens wèlle vertèlle kinne daan zègke ; "Kiek lui dao steit 't " en neet "dao STOOND 't , loer mer op dee foto!!!!!!!!!!!!
Um alvas e veurbeeld te numme :'t Zal toch neet zoe zien dat d'n oeterein gevalle Perroen, oonder de catogerie "DAO STOOND 'T " geit valle!!!!!!!