De Sinterklaoskadoos zien ev els al opgegete, aongetrokke of geïnstalleerd. De graaiende kinderhennekes, en de verpópzakde geziechskes zien ziech alweer aon 't veurbereie op de volgende laojing die daan te grabbel ligk oonder de väöl te vreug gekapde keersboum. Höbbe de awwers ziech get ingehawwe wat de prijze betröf, doen de ampa's en ama's zjus of hun neus bloojt en goeje die toch nog e sjöp(ke) de-bovenop.
Väöl, groet en deur, is 't devies. Strak geit 't misjien neet mie...
Meh gong 't eigelek neet um sfeer, hoeselekheid en de dao-aon verwante gezèllegheid?
Wee rappeleert zich neet de gedèkte taofel mèt gevölde depe teleure, roondum gelardeerd mèt nui sokke oerwermers of heise.Veur de mennekes e oto'ke en de vruikes kraoge nui kleidsjes veur de póp, boe Mam, naodat de kinder in bèd laoge, orelaangk stevig aon gebreid had. Gezèlleg aon de taofel same mèt de piepraokende(toen waor dat ev els nog gezoond...) Pa , knutselend aon 't póppehoes en/of graasj , wat daan 't "hoofkado"moos weure. Ouch zie genote vaan de daankbare uutinge riechting "Sinterklaos" es s'mörgens 't benkelek momint waor aongebroke en de kinder de "gooj Kamer" instörmde. En um de geläöfwierdegheid te vergroete, mooste veer "Sinterklaos dee heet gezag, veer mage speule "zinge. Daornao rende veer de straot op um de kadoos aon de naoberkinder te laote zien. Dao waor 't zelfde sfeerke en mochte veer e speculaaske pakke oet de gemeinsjappeleke keukskesdoes. Gezèlleg same speule en daan weer trök nao de wermte vaan d'n eige hoes.Tot Pa en Mam die daog meh mooste giepe en niks kraoge, veel niemes op . 't Waor en is jummers e kinderfies.
Sinterklaos vertrok, de Keersmaan op zie sleike, getrokke door Rendere, stoond d'r aon te koume.
Wiet vaan te veure stoond Mam in de keuke.'t Keersdiner vroog noe alle aondach. De hinnesop moos daog trèkke en de rollaad laog te suddere in de pan op de cuisinière. Häöre , lètterlek, kraakwitte , sjolk gaof get fiesteleks aon ´t gehiel.´t Hiel hoes völde ziech mèt gäöre , die allein mer mèt die daog te ruuke waore en lekker ete verraojde en de gezèllege sfeer in hoes allein mer vergroede
In de Keersnach ,´s mörgens um vief oor nao de nachmés.Zellevers waor iech mèssendeender. Dus iech zaot ierste rang. Dat kóste neet väöl aander kèrkgengers zègke. Stampend vol waor 't altied. Neet dat de lui aon ´t stampe waore . Nein , zoeväöl luikes kaome daan nao de kèrk.
Drei Hiere Mès (drei geisteleke die de mès tegeliek laoze) mèt väöl mèssendeenders en acoliete.Die lèste dat zien, zègk mer, hoofmèssendeenders. Drei mèsse woorte daan geleze... Achterein. Iech höb noets gewete veurwat. Meh, de lui bleve wel zitte of stoon......Me vind ´t noe al lesteg de zege nao ein mès aof te wachte....
Daonao nao hoes. ´t Keerskinneke woort in de krib gelag, de keerskes in de boum aongestoke , die mèt e soort knieperke veileg in de boum waore aongebrach . Keersemes waor begós.
De secijsebruudsjes woorte gewermp en oonderwijl sjoof ´t gezin aon taofel aon.
´s Middags koum de hinnesop en rollaad op taofel. Dao gong altied ´n waarsjouwing aon veuraof, um veural neet te struie op ´t damas taofelkleid. Zön vaan de sop en ´t ete, mer zeker ouch vaan ´t taofelkleid ! De centrale radio woort aongezat of ´n LP gedrejd mèt netuurlek Keersleedsjes.
Gezèllegheid dat waor troof...
Tegeswoordeg geit ´t allemaol eve anders.
De kadoos , die noe mèt Keermes eve voltalleg en nog deurder zien es mèt de , koelek drei weke geleie , gevierde verjaordaag vaan Sinterklaos, weure oonder de keersboum vandan gehaold. Ze bliepe en bloepe . Lempkes, roeje en greune, veur wat daan ouch, goon aon en oet este de apparate aonzèts totste hartstikke sjeel devaan weurs . Sinterklaosleedsjes en Keersleedsjes huurste allein nog mer in "house"oetveuring. . Es ´t mer lewej maak.
Ete weurt boetenshoes gedoon.` "Veer wèrke ´t gans jaor , iech wèl ´t noe wel ´ns veurgezat kriege.".is 't excuus. In October al löpste de kans totste in ein of aandere winkel de Keersboum umlöps umtotste dee in deen tied vaan ´t jaor nog neet op die plek verwachs !
Keersmèrte wèlle allemaol ´t ierste zien. Kommérs, kommérs en nog ´ns k.... geld verdene. Dat is ´t devies.
Netuurlek tije verandere en veer kinne us in ´t algemein get beter hellepe. Dus grenze weure verlag.Winterland heet zien atracties aongepas en perbeert us de gezèllegheid boetenshoes te laote zeuke.Mer laot dat toch neet goon ten koste vaan die hoeseleke gezèllegheid. Laot sfeer en gezèllegheid mèt die daog noe ´ns prefelere. ´t Kaope en geve vaan kedoos huurt dao bij .Mer allein um de gezèllegheid te vergroete en toch neet veur `de höb`. Vreuger waor ´t ouch neet alles, meh de hoeselekheid stoont toch hoeg in ´t veendel. Dee veendel is NEET te kaop.......mer wel WEERDEVOL.
´ne ZAOLEGE KEERSMES en eint IN ALLE OPZIECHTE GOOD JAOR 2006 veur uuch en die vaan uuch.