Dat zag iech tege mich zellevers wie iech in Jannearie besloot te goon traine veur de Kennedymars. De bis behöb mèt dat virus of neet. Dus gong iech op weeg veur m'n ierste wandeling vaan de väöle die nog zouwe volge. 't Waor guur en regenechtig . Beslis gein weer um lekker te goon laope. Mer de moos noe einmaol de nuudege km-ers veuraof oonder d'n sjeun laote doorsjievele um strak die 80 km te kinne aoflègke.. Of 't daan ouch geit lökke hingk ouch nog vaan mie factore aof. 't Einegste wat miech dweers zouw kinne goon zitte waor m'ne rögk. Dee is, zjus wie de res vaan mien lief euveregens , nog vaan veur d'n twiede wereldoorlog. Wat höbbe die opgestapelde werv els in al die jaore neet mote doorstoon……Dat is al begós mèt moerbokke.Toen waor iech nog mer good e jaor of tien èlf aktief op deez eerd. De awwere oonder us weite dat nog wel. Eine gong gebók tege de moer stoon en de res sprong de-bovenop. Dat waor de ierste beproving veur miene rögk in miene jäög. Beroopsmaoteg kraog heer -miene rögk dus- ouch flink vaan ketoen. Zwoer lufte. Oonder d'n oto in, oonder d'n oto oet.Thoes, verbouwinge, sleipe mèt teg els , zek cemint (vaan 50 kg) zand en gaank zoe mer door.En oonderwijl ouch nog de vrouw euver d'n dörpel gedrage wie veer trouwde. En noe .Noe iech häöm – miene rögk dus - veur mien plezeer nuudeg höb , noe begint heer te prottestere. Dat hèlt in dat “heer” op de mies oongelege mominte , zjus es iech dat neet kin gebruuke, zich manifesteert.Mer zjus wie al die aandere van veur d'n oorlog, demèt stoppe of oetstèlle , zit neet in eus karakter.Door- zètte is de leefregel.. (Euveregens euver die vaan nao d'n oorlog niks daan goods…………) De moos zoe op d'n wäörd lètte allewijl. Veurdatste 't wèts höbste ein of aandere aktiegroep aon d'n wand els jeun haange.

Wie gezag. Iech höb doorgezat. Alles bijein zoe'n dikke 200km in de maonde veuraofgaond aon 't benkelek momint, de Kennedymars zellevers, gelaope. Neet allein de Tempeleers höbbe zoe'n momint. Iech ouch. Edere kier meldde ziech dat oonderdeil vaan 't minselek lief dat miech al die jaore dat iech miech op “gen eerd” beweeg , rech heet gehawwe.Dao tegeneuver moot iech uuch zègke(sjrieve) dat blaore of gewriechspijne zien oetgebleve. De sjarneren in ink els , kneeje, en vaan m'n heupe, m'n zwejjende erm ,èllebaoge, sjouwers en gaank zoe mer door, de vinds 't allemaol vaanzelfsprekend dat dat good functioneert. Watste ouch demèt deis. Zelfs d'n ouge drejje vaan links nao rechs. Dus dao zal ouch wel get drejbaars zitte. Pas este dat allemaol neet mie kins of dat 't ein en aander begint nao te laote weurste dich bewus vaan 't feit dat 't allemaol neet zoe vaanzelfsprekend is. En steiste dao get mie bij stèl.

Behalve iech netuurlek. Iech höb nog eine kier 80 km trampele de tegenaon gegoeid. Dat zien oongeveer zoe'n 98.000 stappe ! Klein duimpje get mie , de reus get minder. Stèlstoon is daan geine veuroetgaangk.

En dat leste - veuroet goon - mooste wel wèlste de finish hole. En dat is gelök. Same mèt hoonderde aandere. D'r waore 'ners bij –zoe-es eder jaor- die 't Paosfies wel hiel lètterlek naome en ech op eier lepe. Ev els zoe zaog 't oet. De gezèllegheid langs de weeg en in de dörpe , hèlt dich daan euverind.D'n vinger kriege get eweg vaan krokètte. Zoe gezwolle.

De lèste km-ers heel mien dochter miech gezèlsjap. En dat löp lekker kin iech uuch vertèlle. Zoe same nao de finish. D'n hielen daag door had iech al tillefoontsjes vaan ze gehad en vaan de kleinkinder. “Opa haw vol en zèt ‘m op.” galmde in mien oere. Dat lèste kinste beter mèt 'n tent doen op vakantie. Mer noe waore 't toch de vitamines dieste nudeg höbs um vol te hawwe.

Oonder verseerde baoge door en tösse de lui door die hun han opein brachte en mèt blomme hun waardering lete merke kaom de finish in ziech.M'n dochter heel ziech get trök. Zie voond dat dat waor weggelag veur de läöpers vaan de mieste km-ers en neet vaan de minste. Gruuts leep iech neve häör op. Iech loerde nao häör. Hinkelde ze noe e bitsje of verbeelde iech miech dat ………………..?

In de aonkomshal meldde iech miech aof en kraog mien cieferke 5 um op de ieder gekrege medaalje vas te make. D'ne naom weurd umgerope, e blömke en dat waor ‘t. Oets kump aon dinger in 't leve 'n ind. Dit waor noe zoe'n dingk. De leste Kennedymars veur miech. (Dink iech)

Thoes gekaome moos de blaor op d'n hak vaan mien dochter häöre voot verzörreg weure…………Dus toch !

Mien ouge waore de ierste, die op dit Paosfies hunne katholieke pliech vervölde ; Ze vele op de kneeje…. . Vaan 03.00 oor op, Dat waor ouch wel hiel erg vreug…………………….