Iech num aon dat de gemiddelde mins euver ''ne fiets besjik. Veural de awwere oonder us storte ziech mèt hart en zeel op de sjelzadels en doorkruuse 't Limburgse en in eus geval ouch 't Belsje land. Prachteg watste daan allemaol zuus. Wie veer joonk waore stoond dat 'r ouch allemaol, mer veer hadde gein oug daoveur. 't Henneke vaan dien leeste vashawwe waor de opgave die mèt plezeer woort oetgevoerd. Dat "stök natuur" dat ziech neve diech in dezelfde riechting verplaotste waor 't einigste boe de aondach nao oetgong.En netuurlek nao benkskes en graasveldsjes.........

Noe is dat eve aanders. Um 't henneke vaan 't einigszins verwelk blömke dat neve miech opfiets vas te hawwe ,mèt mien bubbelend henneke dao is stuurmanskuns veur vereis. Anders ligke veer binne de kortste kiere in de zachte berm.Dee, es 't diech euverkump, neet mie zoe zach aonveult es toen..........

De groetste elend tijdens eus fietstochskes, weurt teweeg gebrach door de dames en hiere sjnelverplaotsers. Ze vlege mèt hun scooterkes langs diech ofste neet besteis. Niemes en niks oontzeend, toeterend (vaan pas op hij kom iech) vlege ze langs dich. Bótsmötske op, sjerm umlieg en veureuvergedoke esof ze stage höbbe gelaope in Franchorchamps. De huurs ze al vaan wiet aonkaome. Iech dui alvas mien èllebaoge strak tege 't lief en de kneeje tegenein : ezzebleef d'r kin gepasseerd weure. Mien haore vlege door de windsnelheid dee ze veroorzake nao väöre en valle nao passage vaan 't moonster veur mien ouge.(o.k. es iech op tied nao de kapper gaon gebäörd dat netuurlek neet.) Me lief weer in oontspanne touwstand bringend vervolg iech miene weeg. Bij d'n twiede euversteek veur fietsers oppe Kennedybrögk weer 'n probleem. Iech krijg haos 'ne nekhernia vaan 't achterum kieke. 't Bèste is um zoen 25 mtr. vaan te veure daomèt te beginne, daan kinste este gelök höbs , nog gebruuk make vaan de opgebojde snelheid, um euver te steke. ESTE 'T HAOLS.... Ouch oto's zien 'n bedreiging .Door de jaore sjarneert 't ein en aander aon mien lief neet mie zoe good. Dus vaanaof mien heupe drejt alles mèt miene kop mèt.En daan prebere op 't fietspaad te blieve.... In mien oughoke versjijnt e blinkend opstakel.Oto, hèt dat in de volksmoond. 't Is sjus of de maan achter 't stuur en zien veu bij de pedale nog mie gaas gief um toch mer veural veur miech door te kinne raose .... Heer sjäört door de boch op 'n meneer boevaan Nicki Lauda roei uurkes zouw höbbe gekrege (es heer ze had) Iech stop mer veur alle zekerheid.. En mèt miech nog aandere. 't Leve is toch get mie weerd, es e wedstrijdsje wee 't ierste euver is, aongoon..!! Nao dat wèld geraos kóste veer euversteke. De neiging tot fluiten oonderdrökkend vervolgde iech miene weeg.

E knetterend geluid gaof de volgende bedreiging op mien levens(fiets)paad aon.. "Slivvenhier laot deez aonval op mien gezoondheid aon miech veurbij goon, mer wel hiel laanksem"...prevelde iech veur miech oet. En of Heer 't hijbove had gehuurd woort huurbaar gaas trökgenome en op 'n ordenteleke meneer gepasseerd. Hé, hé dach iech, zoe kin 't dus ouch. Evels stopte bij e volgend punt 'ne oto en de sjeväör gaof mèt 'n handgebaar aon dat iech moch euversteke.Die lui bestoon dus toch !.Gein getoeter of geknipper mèt leech. Nein, gewoen vruntelek aongeve dat ederein op de weeg (en trouwens euveral !) eveväöl weerd is. E verkiersbord is ein dink en fatsoen 'n aander..Ouch este eve get ondoordachs deis.Foute make veer allemaol. Ofste noe oto rijds, op 'ne fiets zits,of vootgenger bis.

Allein ierlek is ierlek. Die gaste op brommers, die die kringe opvoere en aander lui gewoen nao 't leve stoon, dao höb iech gein good woord veur euver, !! Gevaarlijk veur aander weeggebruukers mer zeker en neet in de lètste plaots ouch veur hun zellevers. Boerum mote euveral borde weurde geplaots um te veurkoume dat lui in e vootgengersgebeed neet oonderstebove weure gerije ? Gewoen naodinke daan höbbe veer daoveur gein verbodsbord nuudeg. Zo , dat moos miech ouch eve vaan 't hart.