Kribke en Keersboum zien opgezat
Op 't resultaot goon veer erg prat

Zoonder enzele en vreigele toch content
D'r vloge gein asbakke door de tent

Alles en ederein steit op zien plaots
Roontenum 't kinneke Gaods

De kamiel griemelt tege d'n os;
"D'n ezel dee heet de kop los"

"Eder jaor es iech get korter bij häöm kom
Zeet heer; "Blijf dao stoon en doech neet zoe stom"

"Mer ezel, de drei keuninge gekleid in hermelien
Die mote veur 6 Januari dao in de krib zien.

Bromp d'n ezel; "Daan zien die nog stommer es iech
Boerum zien ze neet veur 'ne brommer gezwiech....."

"Trouwens wat iech ouch neet kin bevatte,
Datste dich door drei maan liets aofmatte"

"Ze veule ziech ech de keuning te riek
Tösse die bölte , alle drei tegeliek."

"Nouw," zeet de kemiel weer op zien bäört
"Lès höb iech miech hendeg besjäörd."

"!ech galoppeerde mèt die drei op miene rögk
"Toen keigelde ze op de groond , stök veur stök

En höbbe de keuninge beslote unaniem
Veer kaope 'nen oto, dit is 'n crime"

Veer zalle 't toch neet goon beleve
Dat 't Keersverhaol weurt hersjreve

En dat veer allein mer hure wat veer wèlle
De weeg kwiet zien oonder .t verhaol vertèlle

Gein staar us de weeg kin wieze
Um aon 't kinneke Gaods de ier te bewieze.

De ier die 't touwkump eder jaor
Zoe-es 't door de ieuwe ouch waor

V'r winse us vrij en gelök op deez eerd
Mer wat is dat vendaog d'n daag nog weerd ?

Veer mote 't netuurlek wel blieve doen
Euvertuigend en neet allein oet fetsoen...