Iech bin, zoe-es geer wèt al jaore en jaore en jaore oonderweeg. In de sjnie, meh de lètste jaore zeen iech dèkser regepole oonderweeg daan sjnie.

Wat iech allewijl ouch gèt mie mètmaak is de vreigel mèt Sinterklaos. Geer wèt wel deginnege dee op zès December zien eerds zjubilei viert. Veer ensele us altied umdat de luikes al in October beginne mèt Keersbuim op te zètte en Keersmerrete te organisere. Ev els kump "Klaos"daodoor get in de verdrökking. Zellevers vin iech dat ouch neet um euver nao hoes te sjrieve. Meh jeh de kommérs wèlt dat , neet iech. Ev els vindt "Klaos"dao gein "balle" aon. "Haang die mer in d'ne boum" zeet heer daan tege miech.

Dit jaor koum iech mèt mien elandespan aon oppe Merret. Iech waor veurnummes um op de Maos te lande. Mien sleike heet n.l ouch drievers. Aongepas aon de weersumstendeghede, he. Mer 'Klaos' weurt al zoe dweers gezete, dat iech häöm dat neet ouch nog wouw aondoen...

Zittend op mien sleike en miech verplaotsend door de loch, sjijnbaor hadde ze vreuger jaore al veurzeen dat 't in d'n touwkoms toch geine sjnie mie zouw geve, , had iech 't al gezeen. Miene leve jong. Wat 'ne puinhaop höbbe ze in Mestreech devaan gemaak. De ein koil nog deper es de aander. En einmaol op de begaone groond brik'ste d'ne nek euver allerlei oongesiever.

De twie "bezunder stadsdevoties " Jan Pieter Minckelers( tijdelek vaan ziene sokkel gehaold) en 't Mooswief jenke traone mèt tuute. Loer mer 'ns in 't vijverke aon de veu vaan 't Mooswief. Zie hèlt m èt häör traone de leeg frittetuute en aofgeknawwelde frikkendelle drievend in häör vijverke. En de traone vaan Jan Pieter douve bekans zie vlemke.Teminste wie heer nog op ziene sókkel stoond. Zien vlam is al oet umdat heer nao 'n aander plekske verhuis oppe erret Es heer eve lang moot wachte ie heer weer op zien nui plekske steit este Perroen oppe Vriethof, is heer hielemaol vervreemp vaan de Merret.

Miene gooje Slivvenhier wat is hij in de lèste maonde allemaol gebäörd.. De kommérs sleit touw.. De zuus wat dat kin aonriechte. De firma die de hèkke heet geplaots heet de opdrach vaan hun leve gekrege. "Bouw 'ne wallemoer vaan hèkke roontenum Mestreech. Daan goon veer daobinne us gengske, zal ein of aandere boetesteise aonnummer cq architek höbbe gezag. Boetesteids, umdat aanders gein Italiaanse, Spaonse of Franse naome aon de nui gemetselde oetwasse kinne gegeve weure. Stèl diech veur...

Had noe ouch mer eine gezag ; "Geine Mestreechteneer mie droet en geine Hollender mie nao binne "Hadde v'r nog gét demèt opgesjote !"

Meh good. 'n Bekind gezègkde is;" Sjangerneer d'ch neet , mer bis verpópzak "En dat bin iech dus ouch.

Miene baard veur de zoeväölste kier in korte tied , oet de hèk trekkend, bin iech aon mien bezeuk begós.. En umtot 't gekind is dat este hij in Mestreech in 'n etablissemint aon de bel rammelts , dat daan vaan diech weurt verwach totste e rundsje giefs, höb iech 'die vaan miech' mer oonder m'ne palto verstómpelt. . Mien bel bedoel iech..

Trouwens wèt geer wat in mien leve de groetste frustatie is gewees? En nog. D'r bestoon gein Keersvruikes! Dus wie iech op deez wereld bin gekoume blijf ,biologisch gezeen , 'n groet raodsel. Iech truus miech mer mèt de gedachte dat kebouters en sjniemennekes 't zelfde lot besjore is.

De Mönt op laopend en de kiekoete inkiekend is 't allemaol eine groete pot naat. Kleier,sjeun,kleier, sjeun, sjeun , kleier en hé hé , 'n blommezaak. Wat 'n magneprachtege oetstraoling heet eur stad toch gekrege..... De Groete staat, de Kleine Staat, de Spèlstraot, de Nuistraot , neet anders. Iech bin ev els blij dat mien inkaope neet hij gedoon hove te weure. De prieskeertsjes zien te klein um de prijze d'r op te kriege. D'n tied dat'ste de minsheid nog kós blij make mèt nui sök , sjerp en oerw ermers ligk wiet achter us. De heise die iech coonsequent eder jaor vernuide veur de bekker en de mèlkboer ,(boe zien ze gebleve) waore gaaroets neet zoe deur. Dao zaote jummers mer haaf vinger aon.(aon die heise) .Boemèt ze 't kleingeld beter kóste sortere oet hun geldtas.

Allewijl is alles disign . Bekans neet mie door miech te betaole. Iech moot in mierderemaote 'nen aonslaag plege op de portemenees vaan groetvajers en -moojers. Anders is 't neet mie te doen. En 't erge is dat die ouch al klaoge."Veer mote de kleinkinder al ederen aofhaole bij de crèche en noe mote veer ouch nog de Keerskado's financere" huurste ze knotere.

Mien slei is oondertösse twie meter langer es , nouw zègk 'ns get, vief jaor geleie. Al deen elctronica vaan allewijl zit verpak in oonmeugelijke doeze. En in die doeze zit weer 'n does en dao-in vindste 't kado. Teminste es te 't wit 'grummelkesspöl', wat dao weer umzit , höbs weggepak .

Boe is toch deen tied vaan stevekes, peperkokemennekes en keerskrenskes in de boum gebleve ? De knien in 't zoer op grameers meneer klaor gemaak , mèt peperkook en lawweleerblajer, azien en goffertsnegel, mèt dao-aon gekoppeld, tevrije geziechte. Hermes, Baluga ?? Toen, ? Bestoonte hielemaol neet.

Ev els , in de nuien Entre Deux is gaaroets geine goffertsnagel te kriege. En in 't Mosae Forum al hielemaol neet. Dao kinste veurluipeg allein nog mer kleier kriege. Nou jéh, kriege. Zoegezag vaan 'tópoontwerpers'. Iech höb vaanaof mie sleike vaanoet de loch, de meute nao binne zien raoze bij de opening. "Makkers staakt uw wild geraas". "Nouw Klaos, waor dao mer 'ns bijgewees...." Wie de 'meitskes' waore oetgeraos, leek 't of de 'boonte störm' de weeg waor kwietgeraak en ziech in de winkel massaol had umgekleid.'t Waor dao neet ;"Meh mie lepke", mer mie ; meh mie bluuske of mie rökske...

Nog eve vaanoet de Wolfstraot nao 't gezèllegste plein vaan Nederland. (Zègke o.a. de Hollenders) Noe ligk 't 'rösteg' debij. Zoe-es 't ouch pas in dezen tied en zeker bij dit plein . 't Slevrouweplein mèt de basiliek.

D'n èlfde vaan d'n èlfde ,dat wèlt zègke de start vaan 't vastelaovendsseizoen , is verplaots nao dat aander gezèlleg plein. De Vriethof. Daan begint geer Mestreechtenere same mèt de res vaan Limburg, dao alvas mèt vastelaovend in te z(oe)....ètte . Bang tot geer te laat zeet.! Stèl diech veur , 'ne Mestreechteneer dee te laat begint mèt 't sjiekste fies wat 't hij gief. Dat is neet veur te stèlle. Dat is zjus zoe get wie 't Mooswief op haange mèt e boektruike, 'n minirökske , pumps aon häör veu en 'n piersing in häöre navel. Oetgeslote!!

De klepel vaan mien bel vashawwend , wandel iech de sereen stèlte vaan de kapel binne. Iech dui mien muntstök in d'n daoveur bestumde offerblok in de moer en sjaar miech 'ne boegie .Eine vaan €0,50 cent. Iech höb nogal get te winse dit jaor.. Iech spreek ze in miech zellevers oet en daon e weesgegroetje debij."Zo, noe is neet allein mienen daag good , meh ouch dee vaan uuch , leef Mestreechtenere en aander bezeukers. Hopelijk hölp 't uuch um al eur winse vervöld te kriege."

"Zaoleg Keersmes", fluuster iech tösse mien snor- en baardhaore door riechting de vreemp oploerende lui in de kapel touw en laop, bijnao op mien tiene, nao boete.

Trök oppe Merret stoonte mien gewei- dragende veervoters gedöldeg te wachte.

"Jahoo, jahoo en Adie Mestreech, tot zeens op 't ind vaan 't jaor 2007 en hopelek zien daan alle veranderingen ouch verbeteringen gebleke" reep iech oonderwijl mie sleike (mèt drievers , iech startte vaanoet de groetste pool oppe merret) los kaom vaan de groond.

Nao oonder loerend en sjerend langs 't daak vaan 't stadhoes , zoag iech tot 't dao oonder noets mie zouw weure es wie 't ins waor.......

Jaomer ? Och , jao en nein. Este behawwend bis wel mer este w els dat de veuroetgaangk neet aon eus stad veurbij geit neet.

Mestreech is/weurd misjien neet mie zoe wie 't waor mer de Mestreechteneer blijf wee heer is ! En dat is 't belaankriekste.