De ierste 1e kemuniefieste stoon weer dr'aon te koume.
Zäölke heure, mèt alles dr'um en dr'aon. Of e tepke in 'ne mèt zeil euverspanne tuin. Is 't 'ne groete tuin, weurt e speulkösse euverwoge.Pa en Ma vaan tóp tot tien in 't nui gestoke Evels ouch 't kemuniekentsje.En netuurlek blijf oma en opa daobij neet achter.E nui behengselke in de gooj kamer is euverwoge mer oeteindelek aofgezwèt. 't Weurt jummers boete gehawwe. Ouch es't slech weer is. 't Geld vaan 't tappesere kin gebruuk weure veur de gaasverwerming oonder 't zeil. De kadotaofel, neet te klein, krijg 'n prominente plaots.
Neet te klein . Vreuger woort 'n sjoen völpen inclusief lere mepke en e pötsje ink kado gedoon of tas en sjotel, prachteg verseert mèt ziene/häöre naom en in 't midde de kelk mèt hostie debove, zèlvere spaorpötsje mèt dao-in gegraveerd "Vaan Oma en Opa", heilege beeldjes, e roezekrenske en netuurlek 't printjse neet te vergete, get boe kinder euvergelökkeg mèt waore. Toen........
Mer vendaog d'n daag geit 't allemaol sjus eve aanders.
De gezèt heet kond gedoon vaan 't fies. Dus niemes hoof 't te misse."Geer kint 't kemuniekentsje e henneke koume geve" ( en Pa de envelöpkes.....)......".zoe begint die anaos miestal. De taofel vaan noe steit al gauw vol. De does mèt "kompjoeter", d'n tèlleviesie (boe opa anderhaaf oor mèt oonder ziene erm heet stoon wachte op 't benkelek momint vaan aofgifte ),cdspeuler,cd-roms ,mountainbike , digitale fotocamera , num mer op , laote gein plaots mie euver veur de völpen .De envelöpkes mèt inhajd weure zörgvöldeg door Pa beheert .Evels de skates ónbreke nog. Heer of zie (de kinder bedoel iech) had dat toch ouch nog gere gehad.
't Fies löp zoe-es gedach. De tap krijg gein rös en stroomp wie de Neker in häör bèste jaore. Ouch good te mèrke aon 't touwnumme vaan 't lewej.Roeje en witte wien de limmenaad, 't kin neet op.En neet te vergete de kaw en wèrm sjotel.... Niemand kump get te kort.
Menier Pestoer gief netuurlek ouch acte de presence. Zoe huurt dat. Heer zuut ein en aander mèt gemingde geveules aon." Weite de lui nog wel boe 't ech um drejt op zoene daag?" Dat huurste häöm dinke. Maonde heet de veurbereideng gedoord. Heer heet oetgelag boe-um of 't gong. De kinder hadden 't ouch begrepe. De devotie die ze lete zien in de kèrk had häöm daovaan euvertuig. En dat e fies daonao 'n bevesteging is vaan 't bezeundere vaan deen daag ,maag allemaol . Mer, vraog Heer, en mèt häöm väöl aandere, ziech aof; "Kin 't neet e bitsje minder fies en get mie aondach veur 't wezeleke"?
Veurziechteg staok Heer de häöm aongeboje sigaar op.De raok dwarrelde nao bove. 't Dröpke wees Heer vruntelek aof. Twie gróppe vaan twinteg kinder hadde de kemunie gedoon vendaog.. Dus daan kinste neet euveral jao op zègke.
Al kringskes blozend en de raok naokiekend riechting hiemel dach Heer;
"Wienie zouw de 2e Kemunie gedoon weure................................" ?
Hennekes gevend en daankend veur 't häöm gebojene, leep Heer nao 't tuinhègk. D'n teks en meziek "Heb jij eve voor mij" storf laanksem weg en bleef oonder 't zeil haange.
" Och Slivvenhier , touwpasselijker kin 't neet" beijde Heer op Don Camillo-echtege meneer z'n ouge nao bove geriech .
Op nao 't volgende fies..........

(De pestoer speul iech evels zellevers, naomes wee iech spreek. Einege euvereinkoms in dinkwereld berös op touwval !)