Robert Kennedy heet 'ns in zienen tied gezag ; "De welvaartsmins is neet mie in staot um 50 mijl te laope binne 20 oor. De Kennedymars is oontstande.

Watste veural neet tege miech moos zègke, is dat iech get neet kin. 'n Lierzame mer veural vermeuende eigesjap. Of moot iech zègke eigenaordegheid. 't Veurdeil vaan zoe'n instèlling is datste dich vaan alles eige maaks boevaanste vaan te veure neet wèts of 't dich wel lök Behaange. tegelzètte, sjèldere, 'ne kraon vervaange tot 't make vaan coplete badkamers touw.

Bringste 't tot e good resultaot daan höbste weer get bijgelierd. Zoe zuus te mer : eder naodeil heet zie veurdeil , zouw menier J. C. zègke.En dat is meinege kier woer gebleke.

Noe die Kennedymars. Wiezoe, dat kins tiech neet ?? Wie zoe welvaartsmins.? Iech had 't toch al twie kier beweze 't te kinne. 't Is wel al weer 15jaor geleie !!! En dus ouch eve zoe väöl jaore awwer .gewore. Veur dat iech miech in miene kop had gezat dat 't sjiek zouw zien um dee weer 'ns te goon laope vroog iech miech aof ; "Wat lier iech devaan en is 't neet te vermeuend.?" Dat ierste moot iech nog aofwachte en 't twiede is erg duudelek. 't Is hartstikke vermeuend. Toch bin iech goon traine.

Stad in stad oet. Te voot. Dat waor 't begin. Toen woorte de aofstande get langer.Al gauw kaom 't antwoord op de vraog; "Wat lier iech hijvaan?" In de ierste plaots , d'n oto laote stoon. Daobij 't loere nao- en genete vaan dinger.Este löps sjeeste neet euveral langs mer numste ouch 'ns d'n tied um d'n ouge en oere te gebruuke en te genete vaan de gewoen dinger in 't leve.

Mien laoproute höb iech oondertösse nao bos en veld verlag. In 't begin hoort iech soms 'n verdwaolde daof koere..Noe op dit memint , 't is inmidd els Lente, huur iech komplete zaangkkoere. Aof en touw weurt dat oonderbroke door 'n spech dee 'n ruimte veur z'n nès oet 'ne boum aon 't beitele is. Ritsele vaan blajer en breke vaan tekskes.De pratsj oonder d'n sjeun. Alles huurste .

Aofgelaope Zaoterdag waor 't "moment suprème" aongebroke. De trainingsmars vaan 50 km .'t Weer zaot tege. Rege en wind. Dee lètste doog zien uuterste bès ederein vaan de weeg te bloze.Zoe wie de km'ers vorderde lökde dat ouch nog bijnao. Tijdens deen toch woord iech geconfronteerd mèt weer 'n belevenis dieste tijdens 'n röstege wandeling neet gauw zals ervare. Pitsende blaore. Wat kinne die apparate steke. En ouch nog op meminte datste ze gaaroets neet kins gebruuke. De moos nog zoe wiet... De zuus deilnummers die iers 'ne flinke stap in hoes hadde , noe de veu, es of ze euver glaas lepe, hiel veurziechteg op de weeg lete "neerdale". Um mer zoe wieneg meugelek pijn te ervare. Aandere laote ze verzörge door ervare blaoredoorstekers vaan 't Roed Kruus. 'ne Kwak jodium d'r op en wijer. Zelf höb iech gewach tot thoes. 't Veel allemaol nog mèt. En veer höbbe ev els jodium dee neet pits..

Paoszaoterdag geit 't gebäöre. 't Echte werk . Hopelek wèrk 't weer get mèt. E lekker zönneke gief toch 'n aander cachet aon zoe 'ne toch. Trouwens zouw de oetdrökking : "Dee löp op eier " ouch dao oontstande zien .......?

Iech haw uuch op de huugte.