Zaoterdagmörge 03.00 oor. De wèkkerradio deit wat iech d'n aovend teveure geprogrammeerd had. Miech wakker make mèt e leuk meziekske. Watste leuk vinds zoe midde in de nach....

Vendaog gong daan eindelek gebäöre boeveur iech al die maonde veur getraind had.Iers korte wandelinge gemaak en laanksem opgebojd nao de trainingstoch vaan 50 km. Este dee zoonder al te väöl kleier- sjäöre doorkumps , kinste verwachte datste de Kennedymars zouws kinne oetlaope. Zeker wètste dat netuurlek noets. M er aon de veurbereiding kin 't daan neet mie ligke.

Tacheteg km. is jummers geine kattepis. (zouwe ze in Mestreech zègke) Tijdens miene trainingstochte had iech 'ne stappetèller aon miene reem vaan mien brook haange. Derteg km laope kaom neer op zoe'n 35.000 stappe. Dus tijdens die 80 km maakste min of mie 96.000 stappen. Dus hielemaol oondinkbeeldeg dat örgens "get pijn " geit doen is 't neet...

Op nao de Sporthal in Sittard.Teske koffie um definitief wakker te weure en de toene vaan e dweilorkes, dat op dat oor al vastelaovendsleedsjes späölde , doge de res. Drök praotend en nerveus op en weer gelaops maakde de zenuwe bij ederein ziechbaar. Allerlei modelle en kleure teskes woorde um de boek gegespeld of op de rögk geinstalleerd. Dao zaot de catering veur de ierste paar oor in.Veur de res vaan d'n daag zörgde mien vrouw dat iech niks tekort zouw koume. Zoe hadde veer dat aofgesproke.

Vief oor. 'ne Knal oet e startpistool zörgde deveur dat ederein en masse nao boete leep. De kaw in. Wat dat waor 't de ierste ore. Kaajd en misteg. Drök praotend en 'ne weeg zeukend in d'n duuster gonge de door dezelfde gekte bevaange wandeleers op weeg veur de 80 km.

In 't begin , zègk de ierste ore, waor 't e laangk lint dat door de dörpkes en door 't veld leep. Wie mie km'ers oonder de veu verdwene woort ouch 't lint oeterein getrokke tot lintsjes en woort 't e stök stèller . De ierste blaore deende zich bij väöl wandeleers aon. Euveral versjene de mantelzörgers veur eine daag in de berm vaan de weeg. Zittend in tuinsteul kaome complete diners op de proppe zoedat de laopende vrund, vriendin , pa, ma, zoon of dochter en netuurlek ouch ama's en ampa's niks tekort zouwe koume. Inclusief vitaminedrenkskes. Ouch Elly verzörgde mich wie e veugelke. Wat frusterend is kin iech uuch vertèlle, es 'ne makeleer e bord in 'ne väörtuin heet stoon mèt de naom BIERmans Zeker este al zoe'n 8 oor oonderweeg bis en dich naat hèls mèt vitaminedrenkskes en zoe...

In versjeie plaotse woorte veer door meziek ,verseerde baoge en bewoonderende blikke vaan de inwoeners de volgende km 'ers ingedreve.'t Waor noe miene derde kier en weer 'n magnefieke happening die iech veur gein geld had wèlle misse. 't In Nuistad stoonte mien dochters , sjoenzäöns en kleinkinder miech op te wachte. Mien kleindochter vloog miech tegemoot en spróng miech um m'ne nek. Neet te besjrieve dat momint. Dus daon iech dat ouch mer neet. En netuurlek zuuste ouch de nuudege élend. Luikes die absoluut wèlle, mer eigelek neet mie kinne. En toch doorlaope. Deen toch weurt op Paoszaoterdag gelaope. Iech dink dat dao de oetdrökking; "Heer of zie löp op eier " Is oontstande ...

De finish is 'n verhaol op zich zelf. Tösse dranghèkke (of is 't draankhèkke ?) weurste de sporthal ingeleid boe de aonhaangk dich steit op te wachte. Euveral blomme en nog 'ns blomme. Mer veural blij geziechte dat 't d'r op zit. Mèt mien opgespangde medaaje , pijn in mien spiere, kepotmeu, doors en naat vaan zweit kinste dich aofvraoge : "Boeveur daon iech dat eigelek" ? Nouw bèste lui ; "DAOVEUR !" en 't geveul datste dat nog kins......

Jaomer, jaomer. 't Blaorebal höb iech mote misse. Iech had gein....