Laopend door de groete Luerstraot riechting Heksenhook, kom iech bij eus aller Fäös. Fäös Olterdissen. Geer kint h'm wel. Sjrijver diechter vaan Mestreechs proza en aander zakes.Umtot m'n bein einege vermeujdheid oetstraolde, zat iech miech tegeneuver häöm op 't benkske. Heer doog of 'r miech neet gezeen had en bleef strak veur ziech oetloere. De kinder links en rechs bleve tegen häöm oploere. Dat doen ze trouwens al jaore. Iech kraog neet d'n indrök dat heer op miech neerloerde.'t Geveul had iech evels wel e bitsje......

Dinkbeeldeg gong iech toch e gesprek mèt h'm aon.

Iech zègk; " Fäös, höbste einege fedusie wat ziech allemaol achter diene rök aofspäöld"? Jao de huurs netuurlijk 's zomers de ballen vaan 't petanque tegenein klatse es ze aon 't speule zien. Meh dat bedoel iech neet. Iech mein 't goei- en smietwèrk boemèt ze Mestreech e aander geziech wèlle geve. Weg" awwe kraom" . 't Moot sjieker, decadenter. Oetstraoling is 't taoverwoord nommer ein.. Nein he. Dao krijgs tiech hij op dat benkske niks vaan mèt. Ouch al maagste op de baank stoon, zuuste nog geine mieter. Este 'ne mobile tellefoon hads en Minkeleers op de mèrret ouch, kós dee diech op de huugte hauwe. Want wat dee allemaol zuut gebäöre hèltste neet veur meugelek. Heer loert rech in de ouge vaan 't Mooswief, mer die heet 't te drök mèt tege de Belsje te vertèlle dat häör votebekske geine aofvalbak is veur leegegete frietetuute vaan Reijts. Dus is 't mer good dat iech diech e bitsje op huugte bring vaan de situatie.

De gesplete Wilhelminabrögk. De slangetong vaan Mestreech hèt 't al in de volksmoond. . Dao is 't allemaol mèt begonne.De kentoergebouwe links en rechs ligke noe eveväöl oonder de groond es dat ze iers debove stoonte.'t Bouwe daovaan höbste indertied ouch neet mètgekrege. Dus wat dat betröf miste niks. Twie friete tuute trèkke d'n aondach op 't daak vaan 'ne oonderdoorgaank dee in diene tied 't kanaal waors.Toen gegraove, daonao touwgegoejd en noe weer oetgegraove Iers dach iech euver die "tuute"; Hoppa weer 'n atractie um Belsje te trekke. Meh nein 't is de aofzuiging vaan deen tunnel. Op datzelfde daak koume ouch terrasse. Dus wat die twie frietetuute oetgoeje weurt door de terrasbezeukers wijer gefèlterd.

Jeh Fäös en daan de statie,d'n Entre Deux ,('t hèt zoe, meh heet gaaroets gein ingeng mie )en trouwens ouch allemaol bouwsels vaan nao diene tied,'t Cheramiqueterrein 't is allemaol veranderd of me is bezig demèt

. Strak kump hij de Heiligdomsvaart langs.'n Prachtege religieuze en culturele traditie Beloer diech dat mer 'ns. Op 'n meneer vaan wel loere mer neet ech kieke.. Daan koume oongetwiefeld get vreuger vrun en zeker bekinde, vaan diech veurbij. De mieste es mèt goud vergulde roomp, mer oongetwiefeld ouch verkleiders dies tiech gekind höbs in 't ech. Ze weure gedrage door Mestreechteneren die tege al dat vernuie zien mer ouch door lui die verantwoordelijk zien daoveur. Dat zien toch zwoer laste die ze mèt ziech mèt drage. Dat bedoel iech figuurlek he Fäös, dat begripste wel. Dat beeldsje(mèt alle respek)stèlt qua gewiech niks veur.