In de ierste plaots; Wie sprikste 't Mooswief aon? Oonderweeg nao de Mèrret bedink iech miech dat inins. "Gooje middag mooswief" klink te sjoviaal. Veer kinne häör allemaol wel, meh ev els ouch weer neet. Mèt de vastelaovend, wied deveur en ouch nog eve daonao, weurt häör beroop wel doezend kier geneump De väörnaom huurste neet. En ouch häören achternaom neet. Wel vaan Sintervaos, Lambèr, Monnie en Gonnie, Jan Pieter, Fäös en num ze meh allemaol op. "t Mooswief blijf alias. Eigelek is dat ouch weer good.
Stèl uuch veur dat in annonceringe vaan vastelaovendsaktiviteite stoond; Vastelaovendszondag weurt Bertha of veurt mien paart, Truia gehese. Dat kinste in deez moderne tied toch neet mie make. Of es J.P.Minckelers de besjermhier waor; "Bèste vastelaovendsvierders dao geit Jan Pieter de loch in." Jeh , daank diech de koekoek, hadde ze de gaaskraon meh mote touwdreije ! Nein dee naom Mooswief is nog neet zoe gek gekoze.
Eder jaor steit ze toch weer prachteg debij. Krans vaan poor en wortele um häöre nek en veur eve de leeg frittetuute en aofgeknawwelde krokètte oet häör vootebekske verwijdert die dao eders kier respekloos weure ingekiepert. Veur eve. Want mèt deez daog is 't 'ne vergaarbak es noets teveure.Es ze nao oonder loert sjaggerneert ze ziech kepot. Ze steit al mèt häöre rögk nao de frituur en loert stoicijns veur ziech oet , um 't allemaol neet te hove zien. 't Liefste zouw ze taankelendraod op de rand lègke.
Dat maag netuurlek neet. Neet good veur de economie.D'r moot gegete weure.. Tot daodoor klodders mayonaise op häör veuj valle interesseert geine mins. 't Körfke aon häören erm duit ze tege häör heup, esof ze op 'ne drökke winkeldaag door de Groete Staat löp. Zakkerollers.. Ze wèt dao alles vaan. Ze zuut 't op mèrretdaog veur äör ouge gebäöre. En ze kin niks doen. Neet sjriewe, neet d'rop aof goon of de pelitie waarsjouwe. En zouw ze d'rop aof kinne sprinte, sjievelde ze oet euver de klodders mosterd en mayonaise. Nein, 't leve es Mooswief is tegeswoordeg ouch neet alles mie......
En daan d'n groeten daag. Vastelaovend-Zondag. Vastelaovend minnend Mestreech heet zich verzameld om 't twiede benkelek momint mèt te goon make in deez korte periood.
Wie ervaart 'ne neet Mestreechteneer 't insjete ? Lees en huiver......
'ne Platte wagel weurt 't Vriethof opgerije. De Mooswijfkes die oorsproonkelek oet Heugem en St.Pieter koume(steit in zien brochure) bringe hun evebeeld vaan pepier-maché ligkend op häöre rögk riechting 't takelapparaat. Ziene Hoege Hoeglöstegheid perbeert nog zoe'n èlf kier häör vaan de kaar aof te sjete, oonder 't gejuich vaan de samegestroomde verkleiders. Die wèlle meh ein dingk : Aon de geng !! Al-evel, umdat 't neet gelök is häör vaan die platte kaar aof te sjete, beslöt d'n Hoege Hoeglöstegheid um häör op te takele....
De Goodgemötste löp e paar kier um 't Mooswief (Koolwijf) es 't vaan de kaar is getrokke door 'ne um häöre boek veraankerde kabel. Oonder ger óffel vaan vanalles en meziek en gejuich geit ze riechting d'n hiemel. Dao hingk ze daan drei daog te haange. Minsoontierend. De einegste vrouw die drei daog laangk oonder häöre rok maag geloerd weure. Machteloos. Wie giefste eine vaan die huugte 'ne drei um zien oere.? Daonao goon ze achter de wiever (wijven) aon........
e echte vierders goon op weeg. 't Groete fies kin beginne. En wie ! "Dao loupe tróppe zingenteer door Groete Staat en springenteer". Dat is 't. En laot die "boetelenders" meh dinke wat ze wèlle. ! Dao höbbe de ECHTE geine tied veur...D'n tied is tekort veur hersespins els . VIERE, VIERE en nog 'ns viere. En es 't "Koolwijf"Assele Goonsdag um twelf -oor-ein in d'n duuster weer op de platte kaar ligk, riechting magazijn, zjus wie alle aander symbole vaan de vastelaovend in gans Limburg en wiet daoboete, oonder de betraonde ouge en oerverdouvend lewej vaan kepot meuj vastelaovend-vierend Mestreech en umstreke , dink dé boetestäönder; "Noe weet iech boe de oetdrökking "ZIEK VIERE" vendan kump ..........