Reize dat is altied fijn
Mèt e sjeep , oto of trein
Praote mèt lui, erme en rieke
Veural aw gebouwe bekieke.

Kèrk,kestiel of pelies
Stoon bovenaon de lies.
Soms mèt e leuk "tuintsje" debij
En 'n beeldegalerij

De vrouwlui oet aander streke
Höb iech 'ns mèt Mestreechse vergeleke.
Die "vaan us" zien allemaol eve sjoen
En eigelek ouch hiel gewoen.

Ze zitte good in 't vleis
En hawwe vaan de Mestreechter Geis.
Zoonder vèrf op hun geziech
Make ze de mieste indrök op miech.

Geläöf miech bèste lui
Wat iech uuch vertèl is neet nui.
Vaan Mestreech tot de Baliare
Die "vaan us" zien neet te evenare !