Gistere leep iech euver de Sjaanderweeg. De weeg dee vreuger jaore begós bij kaffee Claossens en oetsjeide bij d'n euverweeg. De kaffee had e terras belag met kiezel en waor gemeubileerd mèt iezere täöfelkes, ron täöfelkes. De drei puu lepe geboge oet nao de groond. De steul waore gedeiltelek vaan iezer en de rögkleuninge en zitgedeiltes waore vaan hout.Gehiel inklapbaar.

Prachtige aw eikebuim gaove nog 'ns 'n extra cachèt aon dat gehiel.

Door de weeks waor de kaffee neet altied ope, mer Zondags 's mörgens altied. Nao de hoegmès woort hij minneg kaartspeul-oorlog oetgevochte. Ezele, mer toch veural Tóppe. De op versjèllende plaotse oonstande deuke in 't taofelblaad waore 't bewies. "Iech pas" kloonk 't meinege kier en dao achteraon kom daan de voesslaag um 't accent op d'n aongekondegde daod te lègke. Dat huurde zoe.

Roond 'n oor of twie woorte de kinder gesjik um de Pa's vaan hunne financiële "oondergaank", in de vorm vaan beer, te redde. Met e stök sjóklaat veur 't keend, woort d'n tied dee Pa te besteie had get opgerek. De hinnesop, thoes, moos nog eve wachte. .

Es iech vaanoaf nommer daarteg op de Sjaanderweeg riechting de Martinussjaol in Wieck leep, in die jaore viefteg, kaomste langs Trui Kooymans, de greuntewinkel en Sjèls de tummerfebrik. Veur de poort 'n handkaar en binne waor altied eine, dee vaan aofvalhout kleppers veur us maakde. Einmaol veerdeg, nao hoes demet, de oonderkante aofbranne, now daan hadste de bèste kleppers vaan de ganse sjaol. En mer houwe demet,d'n erm oetswejjend, totste de blaore tosse d'n vingers hads. De lol daovaan oontgeit miech noe nog.'t Kloonk leuk. Dat wel.

Oonderweeg nao sjaol doge veer ouch wel 'ns ne sumpele vörm vaan kloet/goeje. Eder 'ne handzame Maoskei in de han en al riechting sjaol laopend de kei vaan d'n aandere prebere te rake. Ev els kaome veer daan te laat op sjaol en thoes kraogste ze daan op d'n kl.. . De broeders die lès gaove koste jummers niks veur ziech hawwe. Alles woort doorgeblajerd!

Had 't gesjnied daan waor de weeg nao sjaol 'ne riechtege lijdensweeg. Este vaan hoes gongs waor 'ste 1.60 mtr. groet. Koelek oonderweeg waore dao al gauw 5 tot 8 cm bijgekoume umdat de sjnie ziech vaskloonteerde oonder d'n kloompe. Vaan d'n inkele woort 't uuterste gevraog. Umklinkend nao links en rechs. En dat gaof ouch weer zoeväöl vertraoging, tot deez kier de Mès in de Martinuskerk vaan Wieck woort gemis. En hup bij Missenverzuim weer e striepke op 't report debeij. Nein, 't waors ech lije in deen tied....

In miene Liegere Sjaoltied laoge ouch de sjuilkelders die in d'n oorlog gooj deenste hadde beweze nog in de Wilhelminasingel, op 't Keuningsplein en bij de Passerel.Ouch veur miech.

Pa wèrkde indertied op de pepierfebrik .Wie veer 'ns op 'ne Goonsdag sportdaag hadde op de pepierfebrik, d'n oorlog waor nog flink aon de geng, mèt daobeij lekker sop um aon te stèrke, woort, wie veer op de trökweeg waore nao hoes, de spoorbrögk gebombardeerd. Me broor en iech höbbe us toen lètterlek de plenkskes oonder de veuj oetgeloupe. Pa had n.l vaan plenk vootoonderzèts els gemaak. Aanders kós iech ze neet numme. Aon de zijkant waore sleuven en daodoor weer zelfgemaakte reemkes geveemp. Bij normaal gebruuk hadste gein probleem, mer bij 't trekke vaan e sprintsje umdat ein of aandere agressor 't op diech gemunt had, dao had Pa eve neet op gerekend. Ein "oonderzètterke" verloor iech en d'n aandere leet ouch los mer kós iech al rennend mèt sjnappe. De sjuilkelder in en veileg waore veer.

En daan dee prachtege, staotegen euverweeg. Twie keer twie groete slaagbuim en twie kier twie kleine. Noets örgens aanders gezeen. Wat höb iech deks stoon loere es de buim geslote waore en stoomlocomotieven hun ket els völde. Deksel vaan de ketel aof, sjloek debove dreije en daan stroomde 't water 't mesjien in..Groete stoomwolke oetstoetend vertrok heer daan weer. Prachtege techniek.

Aon eine kleiene euverweeg stoond 't ieskraomke vaan Venezia. Meinig döbbeltsje vaan miech is in 't sigarekiske verdwene. Later, wie iech groeter waor, ahum, stoond Venezia bij de ambachsjaol in de St. Maartenslaon mèt 'ne dreiwieler.'ne Bakfiets . Vaan häöm koch iech mien ierste sigrèt. Old Mac veur 5 cent. Heer maakde ziech steinriek daomèt. Neet vaan miech allein netuurlek. Vaanoet de speulplaots rende de haaf sjaol nao ziene greun/ roeie bakfiets dee 't model had vaan 'ne kano en glunderend gaof heer 't gevraogde. Thei Venezia recommandeerde veur de sjaol in de Lieg Barakke zien friete en aander baks els aon. 'T controlere vaan de temperatuur vaan 't vèt doog heer door d'r in te spije. 'T sisgeluid waor bepaolend.

'T bovenstaonde geit diech allemaol door de kop wandelend euver de weeg boe 't awwershoes stoond en nog steit. Esof 't gistere waor.De Sjaanderweeg is ouch veranderd. Sjus wie d'n tied.

Blikske stampe, kokerelle, reipe, verstöpperke, moerbokke, litse, knikkere(huive), voetballe en Gofie rope es 'ne politiemaan zich op ziene fiets leet zien, eve sjuive veur peerd en kaar, es gezin nao de kerk goon, messendeender zien, en bij 't verstöpperke oet de väörtuinsjes gejaog weure.'t Weurt in mien geheuge gekoesterd.

Nao toeskoms vaan de wandeling laot iech miech in m'ne stool zakke. Mèt 'ne griemel op mien geziech loer iech door de kamerroet nao boete.

Gein kokerelle gein blikskes stampe of reipe, mèr 'ne gamin zittend op ziene rugkzak tege 'ne lanteriepaol speulend mèt ziene Gameboy, z'n bein in de göt...De bös kump langs. Zoonder op te loere trèk heer zien bein in........

't Straotbeeld anno 2005....