't Is al weer e tiedsje geleie dat miech gevraog woort ; " Gène, zoe heit iech vaan väöre n.l. , Gène este 't leuk vinds en de höbs zin d'r in , zouwste daan get wèlle klusse in 't Peshoes ? Dao is oets 'n theater in gewees , mer zoe-este oongetwiefeld wèts ; 'ne ieverege oonkroedbestreier zaog ouch 't interiäör vaan 't Peshoes aon es zijnde oongesiever. Heer neet mer ziene branner. Euveregens neet mèt opzat. Dat neet. Ev els 't theatergedeilte brandde wel gans oet. ...Geer begrep; "De pes waor in de gesjiedenis vaan de naom vaan dit gebouw , veur d'n twiede kier oetgebroke !" zoe gezag.
Mer indachtig 't gezègkde ," Oonkroed vergeit neet " , moos 'nen haop wèrk verzat weurde .Oonkroed kump vaanzellevers trök, mer " 't zjieleetestheater" weer functioneel make , zouw neet vaanzellevers goon. Dat waor wel duudelek.
Iech had tied , waor vrij en gewèlleg . Mien geweldege dochters voonte 't zoe wie zoe mer niks dat iech nao mien pensionering allein euver straot zouw laope. Bang dat iech oonder 'nen oto zouw kaome. Dus woort iech indechteg hunne angst gauw vaan de straot aofgehaold.
Op 'ne mörge trok iech de wèrksjeun en mien "kroeppekske" aon, en waor gereid um mien beste beineke en ouch henneke veur te zètte.
Same mèt Jos de poompemeker, Ton , de gepensioneerde theatertechnicus en toneelmeister zien vrouw Annemie en aander tóp-enthousiastelinge , waore veer klaor um oonder de bezielende leiding vaan Ad (actäör en bestuurslid) aon 't karwei te beginne.
Toen iech veurziechtig de deur ope doog in de poort,vaan 't Peshoes en iech veur d'n ierste kier nao de brand hij binnekaom , sjrók iech toch wel eve..Wat 'ne rebzjie.
Nog neet zoe hiel lang geleie, kaomste nao binnekoms aon e täöfelke, kochs e keertsje, hóngs d'ne palto op, leeps door de deur , gongs nao de bar, bestèldes e pèlske en 't begin vaan 'ne gezèllegen aovend waor e feit.
Dat waor noe eve aanders. 't Ganse interiäör, of liever , wat dao vaan euver waor, waor zwart geblakerd en wat ins 'n theater veurstèlde , zaog noe oet als ein groete ruimte Hij en dao euverbliefsele die wat oets same d'n inboedel hadde gevörmp .
Lui vaan de aw garde vaan toneelvereineging M'46 waore al begonne mèt 'n ierste poging hij weer get vaan te make.
Get ? Kom noe .'n Enthousias en ambitieus nui gevörmp bestuur zaog 't hielemaol zitte. Dit fantastisch gebouw op die fantastische plek in Mestreech zouw en moos weer 'n Theater weure . Eint mèt alure.
't Ierste wat in mich opkoum wie iech de sjaoj in miech perbeerde op te numme , waor de indeiling veur de fatale brand....
Dao stoond 't buffèt ( veur 'ne Mestreechteneer dè plaots in wat veur gebouw daan ouch dat heer 't ierste lokaliseert) Dao waor de tribuun, 't toilèt, de garderobe, 't beleechtings en regisäörshökske boven-aon de trap vaan de tribuun,. Alles woort wie 'n diaveurstèlling in miene kop aofgespäöld. Dat doorde neet lang. Hij moos gewèrk weure. Dat waor duudelek. Rappelere kump later wel. Iers aon de geng.,
Teg els zètte, mörkes metsele,deure en sjabrange plaotse, toilètte installere en alles verve. Elly kós thoes aon mien " kroeppekske " zien welke kleur iech deen bewusten daag had gebruuk. Mèt de vraog daobij; " Of wel genóg verf op de moer waor terech gekaome?" Aon mien kleier te zien twiefelde ze dao nog wel 'ns aon!
Keuke plaotse, rèkke make, tribune opbouwe,spots ophaange en last but not least ., dao höbsten 'm weer ; .De bar e pläötske geve..'t Waore allemaol wèrkskes die gedoon mooste weurde. En ervaring dao-in of neet, hij moos aongepak weurde. DOEN...
Tösse al dat gedabbel door woort ouch al veurziechteg e stök gerepeteerd en opgeveurd. "De show must go on." Neet daan..? De speulers mooste in vörm blieve en HET PUBLIEK moos de lokatie good in 't geheuge hawwe....
Wie euze beleechtingsmaan en aajttheatertechnicus vaan Kunstmin in Dordrecht de spots installeerde en prachtege decorsgordijne gong drapere, begós 't alweer op 'n theater te liekene.
'n Ech Mestreechs Theater ; " 't Pesthuys Podium "
ORANJE teg els in keuke en toilètte (Oranje bove) .
DE VERGRIJZING ( ouch in Mestreech 'n item ) Die sleit hij in 't gebouw ouch touw. Liters grijs verf höbbe veer euveral oetgesmeerd. Liech gries, doonker gries, ...En ouch nog .door lui die zelf oonderdeil zien vaan die grijs golf...
'nen Magnefieke houte vloer woort gelag . .( Waar op ( NEET IN ) 't bronsgroen eiken hout 't nachtegaaltje zingt "!) Geer zalt 't goon mètmake hij in 't Peshoes.
Mestreechter gezègdes höbbe veer tot leidraod gemaak . vaan eus inspanninge
B.v in Mestreech zègke ze ; " 'ne Piering veur rijstartel gebruuke" wat zoeväöl wèlt zègke es ; " Dich altied weite te behelpe." En dat is noe zjus wat veer vrijwèllegers höbbe gedoon um te perbere 't Peshoes weer es theater te kinne laote functionere.
Mèt wieneg geld mer mèt hiel väöl enthousiasme en inzat .En us soms behelpe mèt de middele die ter besjikking stoonte.
't Is nog lang neet veerdeg . Laot dat duudelek zien. Ev els " Veer höbbe noe de naolje bove de zoum "
't Begin is-ter....
En um nog mer 'n Mestreechs gezègde de tegenaon te goeje;
"DE Pèl IS GEDREJD, ZE MOOT NOE GESLIK WEURDE.........!"
En...., bestuurlek Mestreech, zoe'n pèl mooste slikke mèt water, hiel väöl water. Dat is 't bèste veur de gezoondheid vaan wat of wee ouch...........