Um twie oor Zoondagmiddag verzamelde veer us in 'n oetspanning in Mesch. 't Ierste groete femilietreffe in 't nui jaor. Oonderdehand 'n traditie. Binne stoond de vlaoj en de koffie al te wachte. Zoe wiet es dat nog neet gebäörd waor , woorte veer bekind gemaak mèt ederein dee ziech 't aofgelaope jaor bij de femilie had aongeslote. Te wete 't ierste vrundsje vaan de ierste verkieringsgerechtegde in de femilie ( bij de kleikinder wel te verstoon), 'nen hoond of drei en e peerd. Is dat oetbreiding of is dat oetbreiding ? De hun besnuffelde 'n ederein en veer , de minse , winsde us 't bèste veur 't kaomend jaor touw. De wins ; "n gooj gezoondheid", had de euverhand.En um dat krach bij te zètte had euze gids veur deen daag , daan ouch 'n gezon wandeling in gedachte. De ganse bijeinkoms waor ouch noe weer door e nicheke gerangeerd.

Nao boete , kofferbek vaan de oto's ope , boe-in de wand els jeun en de Noorse sokke laoge. Links en rechs woorte op mörkes en otobumpers de rijstartele stevig vasgemaak. 't Gekuim waor neet vaan de loch. De brookspiepe opgerold en de kinder maakde zich de reme vaan de hun meister. De wandeling k òs beginne.

Nog get restante vaan fiesverleechting beloerend in 't dörp, gonge veer al gauw via, door de rege vaan de aofgelaope daog gewore tot modderpeedsjes, 't dörp oet. Nou jeh. Peedsjes. Wat devaan euver waor.

Slebrikkend en bijnao pierewètte drejjend volgde veer 't peerd mèt berij(st)er. Mèt e bitsje fantasie waor 't zjus es-of veer 't verhaol vaan de Dreikeuninge naospäölde.Bij us geine kemeel mer e peerd. Gein wijze oet 't Ooste,mer " eigewijze" oet Oesj en umstreke die op gans "eige wijze" op weeg waore nao friet mèt sajs, slaoj en e pèlske....

Oppenins "vloog" 'ne collega opa aon miech veurbij. De oonderkant vaan de brokespiepe deep in de gebreide sök geduid.

Ziene oetgedunde haordos wapperend in de wind door de hoege snelheid boemèt heer ziech meinde te mote verplaotse. Waor dao get gebäörd ?? Woort zien hölp mesjien op pries gestèld örgens ? Niks vaan dat alles. Heer rende nao de kop vaan de wandelcortège umdat zien kleindochter op 't peerd moch zitte en heer dat op de geveulege digitale plaat wouw vaslègke. Dat heer daomèt zien gezoondheid in gevaar brach kòs häöm eve niks sjele. Oma droog ouch häör aondeil bij door häöm (opa dus) te instruere vaanoet welke positie heer dat moos doen. 't Resultaot woort aon 'n ederein geshowt. Terech. Zoe bleek.

Pratsje, pratsje door 't Limburgse land. De opmerkinge euver de vloerbedèkking waore neet vaan de loch. Get wat de gezèllegheid allein mer verhuugde.

De hun, die op twie nao zoe'n korte puutsjes hadde dat hunne boek door de modderpole sopde, zaoge nao e keteer wandele inins oet es e gans ander merk es wie ze waore aongesjaf. Es ze los mochte laope sprinde ze de weie in. Zie wel. De res vaan de meute waor blij dat ze op de bein bleve. Sprinte waor neet de bei. De kinder enselde zich mèt de hun. 't "Zit!", "Hier"! en "Blijf"! waor neet vaan de loch. Iech kraog d'n indrök dat de kinder die bieste behandelde es wie zie door hun awwers in 't dageleks leve woorte aongepak. Die kinder dachte ; veer mote altied nao euz Pa en Ma luustere en noe 'ns kieke wie dat mèt die bieste zit.!....Euveregens., luustere vaan die bieste deit neet allein hun zellevers mer ouch ziene/häöre baas däög. Zjus wie bij de kinder....

Eindelek kaome veer op 'ne geasfalteerde weeg. En dus weer get korter bij de friet mèt sajs en 't pèlske.

Stampvotend , um de modder tösse de sjoonprofiele oet te kriege , woort 't lètste stök vaan de wandeling aofgelag riechting eetkaffee. Hij en dao sleipend mèt de sjeun door 'ne pool.

Kofferbek gonge weer ope. De munnekes hoonge al ope. Sjeun in plastic tuute gedoon.De hun kòste thoes in hun banches(ech Mestreechs) goon druuge . En juh, de kaffee in. Daor stoonte de ierste al aon 't buffèt. Of die gefoeteld hadde of gewoen snel waore ? Veer zallen 't noets wete.

Iech hoort 'n stum oet 't grupke es waor 't 'ne ingel dee de blij kemissie kaom bringe : "Gène e pèlske"? "Es iech dich neet oontreef" waor mien reactie. En dat waor sjijnbaar neet zoe. Ev els woort miech "de gele batteraof"al aongereik.....En weer kloonk : "Gezoondheid"

Noa d'n diner , boevaan altied alle "geng"(kiek bove) good smake, gonge veer weer op hoes aon.Adie en tot 't volgend jaor mer weer. Es God 't beleef.

ZOE "T JAOR IN SAAMHUREGHEID MèT FEMILIE 'T JAOR BEGINNE IS TOCH 'T INDE ! Of neet soms ?