Es gepensioneerde biste euveral inzètbaar. Zoe gauw ederein wis dat mien wèrkzaam leven op 'n ind leep , begóste bekinde en femilie te verbouwe, kamers te witte en te tappesere , tuinen oppenuits aon te lègke en hun hoes te sjèldere. "Iech hoofde miech neet te vervele" waor de door hun oegevoonde leefregel. Zjus of iech dat vaan plan waor.... En 't is toch sjiek este get te doen höbs.De godsgansen daag thoes zitte is ouch niks....

Weer gonge aandere bepaole wat iech "moos" doen. Had iech dat neet achter miech gelaote? Veur deen tied höbbe ze ziech gaaroets neet bemeujt mèt mien tiedsinvölling. Noe voonte ze 't toch belangriek dat iech vaan de straot aof waor, zoedat iech neet oonder 'ne oto kós koume. Veur iech 't zelvers in de gate had greujde miech 't wèrk bove de kop. Iech vroog miech aof wie iech zoonder ensele vaan deen "drök"kós aofkoume. 't Veurdeil noe is , dat iech zelvers kin bepaole dao mèt te stoppe of neet Die beslissing waor gauw gevalle.. Thoes weurt alles good bijgehawwe en bij de kinder bin iech ouch nog inzatbaar en de res help iech nog este noed ech aon de maan/vrouw is. Oeteindelijk is röste ouch e wèrkwoord. Allein weurste dao neet meu vaan en 't is heerlek um te doen. Ore, wat zègk iech , daog, hèlste dat vol.

Nein daan de kleinkinder. 'n Zege ,um dao d'n aondach en d'n tied aon te geve.

Aofgelaope Zaoterdag bin iech mèt mien einegste kleindochter , iech bin ouch nog de gelökkege opa vaan drei kleinzäöns, nao peerdrijlès gewees. Ze is zeven en vindt, wie väöl meidekes vaan dee leeftied en get awwer , peerderije prachteg. De tes vaan häöre jack gevöld mèt winterwortele, cap in de hand, sjmikske in d'n aonslaag, rijstievele aon en vol gooje mood , gonge veer nao de manège. Ouch droog ze e soort kogelvrij ves. "Dat is veur es iech vaan ´t peerd aofval en heer/zie per oongelök op miech zouw trejje" , waor 't antwoord op mien vraog , boe dat good veur waor. Iech sjrók ; "kin dat ouch al vaan ´t peerd aofvalle"? In mien rappelere kós iech miech neet veur de geis hole dat de cowboy's in de fèlms zoeget droge...mer toch dèkser oonder 't peerd honge daan de bovenop zaote!

De wortele in häör tes waore veur nao de lès , zag ze. Aanders verweenste ze te zier.

Gruuts wie 'ne pauw leep iech neve häör op riechting "de bak" en oonderwijl zat ze häör "bótsmötske"op. De peerd stoonte al veerdeg mèt de lierlinge vaan de aofgelaope lès nog deneve. Ze zeukde ziech eine oet en leep riechting Ester. Zoe hèt dat bies. Ze woort geholpe bij 't opstijge, reme woorte aongetrokke en de stijgbeug els wie veilegheidsreme in 'ne oto, op maot gemaak. Gerös gestèld door zoeväöl zörg, leep iech nao de bar um vaan achter de roet häör veriechtinge te beloere.

Wie 'n vollierde amazone, sjoen rechop( väöl sjoener este tien aander lierlinge, 't is jummers mien kleindochter) de hakke vaan häör stievele dwingend tege de boek vaan ´t peerd duiend en mètbewegend , draafde häöre Ester door de bak.

Wie ze langs de roet kaom gong hiel eve dat henneke umhoeg. Zoe´n ," opa iech höb diech gezeen henneke mer bin noe bezeg...Prachteg um te zien en mèt te make. Daan biste ´ne beveurrechte mins. Geluif miech.

Zoonder miech te waarsjouwe (boerum zouwe ze) kraoge de kinder opdrach um mèt hun peerd te galoppere. Mèt ´n rot vaart vloog mien kleindochter op e galopperend peerd langs de roet. Iech versjlikde mich haos in miene zjus genome slók beer. Ze heel ziech good. Doordat häöre Ester zoe rap waor hong mien kleindochter get achtereuver en deende de teug els ieder um häör op 't peerd te hawwe daan um riechting aon die baj te geve. Miene hartslaag hervoond ziech. En Fleur, zoe hèt de kleindochter, had häör `trej-mer-op-miech-ves `neet nuudeg gehad.Dat zien zoe vaan die kleidingstökke, die min of mie verpliech zien, mer boevaan ederein hoop datste ze NEET nuudeg höbs. Zjus wie mèt verzekeringe aofslete.. De deis 't , mer este gein beroop d'r op hoofs te doen biste e stök beter aof.

Ouch häöre Ester kaom weer in häör normale opa-gerös-stel-ritme . God zij daank.

Nao de lès mooste de kinder zelvers hun peerd aofzadele en nao de stal bringe.Daonao woorte de bitte aofgewasse.

"Èn opa, heb ik ´t goed gedaan"? , vroog ze wie iech mèt häör opleep nao de stal. Ze keek nao miech op.oonderwijl häöre Ester nao zien nachverblief begeleidend . Iech dach keend de höbs gein idee wie ´ne opa ´t vindt um hijbij te kinne zien. En netuurlek höbste ´t good gedoon. ´t Kós neet beter. Want de bis MIEN kleindochter....Mèt twie neuze in de loch, die vaan häör en die vaan miech gonge v'r nao hoes.

Wiezoe kamers tappesere, verbouwenge, verve, oto pótse, num mer op ? Iech weet väöl leuke dinger die miech vaan de straot aofhawwe.......
En dat waor dao eint vaan!