Wat doen veer dit jaor.Goon veer oet mèt de Vastelaovend ? Laope v'r mèt in de groete cortè ge.Numme v'r de kinder mèt of bringe veer ze nao ampa en ama? Trèkke veer mèt mèt de kindercortège en numme v'r de kinder daan wel mèt. Make veer zellevers e pekske of kaope veer eint. Heure kin ev els ouch."De tèddevo, vrouw, maakste dee ouch weer zelvers zjus wie de eiges ingemaakde hieringe. Heerlek waor die 't veureg jaor.Wetste nog?" "Jaozeker weit iech dat nog",zeet de vrouw daan ." Dit jaor wow iech 't miech toch get gemekeleker make"."Good daan weure die gekoch" "Nein, nein nein." "Memintsje, neet zoe gauw. Al die aander vraoge zien nog neet beantwoordt."

Iech dach dat veer dit jaor nao Turkije zouwe goon , of vergis iech miech.? D'n Hiele zomer höbste miech bekrope.Veer zouwe en mooste nao Turkije.Wètste dat neet mie? 't Begós al in Cadzand aon 't strand. Kaajd, de zwumbrook aon, 't windsjerm stoond op en bol.De keulbox mèt dao-in 'n kan mèt werme koffie.(diech zags nog, es get kaajd in dat dingk blijf, blijf 't ouch werm) um, dat boe-in de zon tekort sjoot , n.l. wermte aofgeve, good te make. De zon späölde verstöpperke mer sjijne, waor neet debij. De kinder bubbelentere in de zand aon 't dabbele..Toen höbbe veer beslote um daan mer mèt vastelaovend nao e werm land te goon.'t Waor noe toch te laat, zagste. En och, zjus wie de zomers, waor vastelaovend ev els ouch neet mie wie 't oets waor...

De geis mich toch neet vertèlle datste bis vergete boe veer 't vaan de zomer op dat strand euver hadde.. Of wel soms? Nein, nein,zag heer zien gefingeerde vergeetechtegheid wegmóffelend., Nein ,dao höbbe veer 't inderdaod euver gehad. Wie veer dao laoge te bubbele.Iech zag nog ; "Es veer noe mèt de kinder same in e bad zouwe zitte hadde v'r e bubbelbad. Gratis en veur niks" Meh, good. Noe de vastelaovend zoe kortbij kump, begin iech toch te twiefele aon wat iech toen gezag höb.... De gezèllegheid die veer goon misse die bij dat fies huurt .Pekskes make same mèt de naobers.Iers vaan te veure 't stof oetzeuke op de Merret , zoe gauw es veer wiste wat 't dat jaor moos weure. Mèt 't stof oonder d'n erm 't Häönsje in um de modelle te bespreke. En daan die aovende es veer same de pekskes in inein zatte. 't Waore aovende die väöl weghadde vaan vastelaovendzittingen mèt eders kier 'ne aandere in de buut.Ze doorde soms tot vreug in de mörge. Nao versjeie eurkes nejje,passe en mete en de nuudege pèlskes vertrok ederein weer nao zien eige hoes. Gezèllegheid waor troof. En de pekskes, och, die waore altied sjus veur 't insjete oppe Vriethof klaor..

"De hieringe stoonte daan al lang te trèkke tösse de laweleerblaajer, unnekes, kroednegel, zwarte peper en in d'n azien. Diech maakdes d'n tèddevo.Wètste nog. Daan zaote veer -ouch weer mèt de hiel buurt- um de taofel.Mèt gesjminkde geziechte of 't maske op de sjoet. Dao woort neet gegete, mer gesjrans. Dat recep vaan diech ; Keendleef, lek vinger lek dom. Heerlek.... "

En daan 't "moment surprème" De cortège. Iers same mèt de res vaan 't volk vaan Mestreech de vastelaovend insjete door Ziene Hoege Hoeglöstegheid dee daan al weer weke gelije tijdens " 't BENKELEK MEMINT" is "oonthuld" op de Mèrret . Daan Sjeng (ouch neet sjenge) aon de geng. 't Is altied weer 'n belevenis, dee cortège.Ederein sprik mèt ederein en maak meziek en plezeer same. E magnefieker fies besteit neet .Zoe get maakste toch neet mèt op broelofte en partije.De zuus altied gróppe lui bijein stoon op dat soort fieste vaan de femilie vaan häöm los vaan de femilie vaan häör of los vaan collega's. Mèt vastelaovend is dat gans aanders . Ederein sprik en sjoenkelt mèt ederein um nao 't fies weer in de anonimiteit te verdwijne, of es" leefste vaan" (dat kin ouch) wijer door 't normale leve te goon. Geweldeg toch."

"Wètste wat jong.Veer laote Turkije en al die aander vekantiebestummenge veur wat ze zien. N.L wiet e weg! Iech gaon eve um nao de naobers en spreek get aof.. Mörge is 't Goonsdag. Stof koupe op de Merret . Daan nao 't Häönsje, 't model vaan de pekskes bekoonkele en spölle kaope veur DIENE tèddevo .Iech zèt de hieringe wel in 't zoer.'t Water löp bij de gedachte allein al, oet miene moond".

"Wee belt mam of v'r nao de groete - en de kinder- cortège de kinder kinne bringe...........?"

"Zjus wie eder jaor, he jong. Veer mage dit fies neet misse en zoewiezoe mage veer us kinder dat neet aondoen. En vaan de zomer? Och, daan loere veer wel weer wijer..

VASTELAOVEND SAME !!