Op 't momint dat geer dit leus, zien de kemunie-fieste weer achter de rögk. Väöl te oetgebreide kaw bufètte en 't verblief oonder de väöl te benajde tent heet de femilie neet ech good gedoon. Gezèlleg, dat wel, mer ouch blij dat't achter de rögk is.
Tied veur de vekantieveurbereidinge.De aofsprake zien al gemaak.Dit jaor weurt 't Zuid Frankriek. Eigelek zouw de femilie nao Drenthe goon. Meh dat kinste neet make. 't Is dao wel sjoen huur, mer väöl te kort bij hoesb....Zellevers höb iech mien collega's al 'ns wies gemaak dat veer op zoe'n 500 km vaan Peries op vakantie waore gewees. In Bleu Village o.a. en e bezeuk hadde gebrach aon Saint Pierre. Prachteg hadde veer dat gevoonde...... 't Kloonk hiel interssant. Of neet soms. Wie iech had oetgelag dat dat 't Blauw Dörrep is en St. Pieter, waor iech inins geine interssante gesprekspartner mie. De moos jummers minstens 2000 km höbbe gerije !
Nein daan al die aandere die 's nachs euver de " otoroute soleil" in eine kier vaan hoes nao de vekantie bestumming rije. Ze zien neet väöl mie es 'n witte oonderbroke striep, die ze behoodzaam volge.Totdat die striep inins 'n doorgetrokke striep weurt vaan vermeuidheid. Tied veur te stoppe. Teminste es dao tied veur is ! De moos toch kinne vertèlle, strak este weer toes kumps(veural "este") , dat de kilometerkes allemaol in eine kier zien aofgelag ! Dat de chauffeur daonao twie daog veur pampus heet gelege, weurt neet vertèld.
Daan de wien. E pèlske drinke is ordinair. Nein wien moot gedroonke weure. Deure Franse wien. Este ze huurs vertrèlle is't of e gans peleton ingele op hun tong heet gedoon wat 'ne normale mins op 't toillèt deit.En 't ete. Hartstikke goojekoup !De wèls 't neet geluive......... Maonde later valle nog de baankaofsjrifte in de bös boe-op 't tegendeil steit aongegeve.
Hoonderde kilometers aoflègke, soms in 'ne gleujendheite oto,tege d'ne zin wien drinke, mèt 'n twie centimeter oonder d'ne navel haangende Bermuda veur joker laope, misselijk vaan 't neet geweend ziend boetelands ete, zörreg of d'n oto mèt welvaartsknóbbel boe-aon 't "hoes" veur drej weke is gekoppeld ,'t wel volhèld, is dat vekantie ?? Wèrrek dat oontspannend?
Kom noe.
In d'n eige umgeving de boel verkinne. Noets betroje peedsjes betrije. E pèlske op e vertrouwd teras drinke . Dat is 't. Misjien weurt geer neet zoe broen en zien de verhaole neet zoe stèrk. Mer dat geer oetgeröster en oontspannender weer aon de slaag gaot veur e jaor weet iech zeker. En daan wèt geer ouch boe de Verwerhook is 't Kaminckelsträötsje ligk of de Kattestraot. En 'ne zonnehiemel deit de res...........