Wie 'ne vollierde rolstoolbestuurder duide en trok iech dat vervoermiddel veur invalide lui door 't zand vaan de Brunsummerhei.

Iech woort twie daog vaan te veure gebeld. Of iech geine tied had Maondag en Dinsdag. Aon d'n aandere kant vaan d'n tillefoon

'n vraogende bijna bedelende stum .Netuurlek had iech tied. De stum waor vaan 'n aktiviteitebegeleidster bij geistelek en liechaamlek gehandycapte.De aktiviteit die ze hadde georganiseerd betrof 'n wandeling euver de Brunsummer hei.

's Mörgens vreug meldde iech miech, same mèt nog aander vrijwllègers in 't tehoes veur daagopvaangkvaan gehandycapte De koffie stoond al op taofel..E lekker teske koffie en kinnis make, waor de ierste aktiviteit wat miech betróf. De glunderende geziechte vaan de deilnummers belaofde 'ne geweldege daag te weure.Ouch de vrijwellegers hadde d'r zin in. Bruudsjes, drinke en alles wat nuudeg is um 't de lui 't nao hunne zin te make woorte ingelaoje.

Aongekoume op de Brunsummerhei kós nao de tegeneuvergestèlde beweging -'t oetlaoje- d'n toch beginne.

In 'ne soort rijaloet vaan rolsteul , electrische en handmaoteg bestuurde, boe veer veur waore ingeheurd, trok de prachtege natuur in. Luikes ,boevaan de mieste vlak in de buurt woende en die door hunne handycap nog noets op de hei waore gewees.

Vaanaof de ierste umwenteling vaan de rajer woort genote. Zie, en zeker ouch veer koume ouge tekort.De twie ouge , dee 'n mins noe einmaol mer heet, woorte euverbelas. Staotege reigers aon 'ne pool trókke es ierste de volle aondach Stèl . Doedstèl es-of ze wouwe zègke; "Loer merop eur gemaak , iech höb d'n tied"stoonde ze aon 't water te wachte op e vèske dat tekort in de buurt kaom. Höbbes. Mèt 'n beweging die bijnao neet te zien waor, zoe snel, had heer zien "botram"nao binne gewèrk.'ne Krink in 't water achterlaotend. Vaanoet de rolsteul woort ein en aander mèt verwoondering gaode geslage.Wat waor dat sjoen um te zien. Wijer laopend en duiend gonge stèlaon de jeskes oet.De reserve stool zörgde dat de nog gevölde rögkzek en de veur dat momint euvertollege kleiding, op de plaots vaan bestumming koum. 'n Picknickplek aon 't water. Ederein kraog e sjoen plekske um alles op ziech in te laote wèrke en oondertösse e bruudsje mèt koffie of thee te verorbere.Eve leet iech al 't sjoens wat de Brunsummer hei te beje heet veur wat 't waor.

De lui eiste door hun gedrag mien aondach op.Wat moot toch in die köpkes umgoon op zoe'ne daag. Op eige krach is dat veur hun neet te doen. Asfaltpeedsjes zien d'r bijnao neet en es ze d'r zien, neet rolstoolvruntelek.De ein koil nao de aander.Noe woorte ze , ouch al waore de peedsjes soms meuilek begoonbaar, nao de sjoenste plekskes gereje.Ziechbaar genetend vaan 't boete zien lete ze 't allemaol op hun aofkoume. .

Wat veur 'ne valide mins de gewoenste zaak vaan de wereld is woort hij ervare es ''n groete oetzundering um te kinne beleve..

Ouch 't sanitaire gedeilte waor verzörg.De professionele krachte lepe ziech de slóffe oet 't lief um de euversjote die dat lief noe einmaol ouch kwiet moot, op ordenteleke meneer ter bestumder plekke te kriege. De Porta Potty. Heer waor in 't bos, veur de privacy achter sjèrme geplaots. .En netuurlek weure de professionele krachte veur hun wèrk betaold. Mer dat bitsje mie, wat hun beroep ouch zoe sjoen maak, dat "bitsje"mie, maak dat de lui eve achter dee geranium, hunne einegste natuur dee de res vaan 't jaor 't kortste bij is ,kinne oetkoume.

Hij en daor vele de ouge, nao väöl perbeers els um dat te veurkoume, toch touw.

Iech kin miech rappelere dat euze pestoer 'ns sjreef toen heer 't euver zien vekantie had; "Staonde bove op 'ne bèrg ,örgens in 't boeteland doog iech mien ouge touw en genoot vaan 't oetziech." Wie dat kin weet iech neet. Misjien dat Jomanda hij 'n rol in späölde Miech waors 't nog neet gelök. Genete vaan 't oetziech, mèt mien ouge touw !. Mer eigelek gebäörde hij 't zelfde.Genete mèt de ouge touw. Prachteg um te" zien."

Aon alles kump 'n ind, zeet 't cliché.Zoe ouch aon 'ne daag dee alletwie de partije voldoning had gegevenDuiend, trèkkend, zweitend, rippererend(electrische stool doog niks mie), praotend,blozend(berg-op)drinkend,koffie of fris,kiekend, vertèllend mer veural mèt e voldoon geveul get veur lui beteikend te höbbe !( en zie veur miech) E bezeuk aon de sjaopskouw, boe de herder zsjus fleskes gaof aon lemkes, brach veural bij de vrouwlui leihertege trèkke op 't geziech.De aaibaarheidsfactor laog hiel hoeg.En de sjäöp oondergonge 't mèt begeleidend bläöke

Mèt e pèlske of aander drenkske woort 't verlore gegaange vochgehalte weer op peil gebrach in 't aonwezege resaurant En dat waor nuudeg.De rolsteul hadde hun spore neet allein in 't zand achtergelaote.

Trökkiekend en refererend aon 't geveul dat zoe'nen daag bij miech opreup kin iech allein mer mie verhäölselke eindege mèt 'ne oproop ; Höb geer vrije tied besjikbaar stèl dee daan besjikbaar. 't Is zoe oontzèttend daankbaar um te doen.Veur uuch zellevers mer nog mie veur deginnege boe geer 't veur daot.De vraog is groet. Geer hoof uuch neet aon te slete bij 'n organisatie es geer dat neet wèlt, mer loert in eur eige umgeving.

"ne Geranium is sjoen. Oongetwiefeld. Mer boete, aon d'n aandere kant vaan de roet, dao gebäörd 't allemaol en is 't ech nog sjoener en zeker veur deginnege dee neet op eige krach dao kin koume.Laot hun ouch genete .