De pekskes in de was gedoon. Of gewoen in d'n drèkbak gekieperd, omdat wat veur wasprogram daan ouch, gein resultaot mie zouw oplievere. De sjmink aofgespeuld en de Hollenders vaan us aofgesjöd En ev els ouch de " katers" nao 't asiel gebrach. Inde vaan Vastelaovend 2005. Ouch is 't zönneke ingelieverd um Slivvenhier de meugelekheid te beje alles weer zuuver te speule. En zoe-es Heer is , zèt Heer Vastelaovend neet allein in 't zönneke mer ruimp Heer ouch weer alles op. Es dat geine Limburger waor(is) weet iech 't neet mie...Veer kriege weer tied um us te goon bezinne op alles wat 't gewoene leve ouch leuk kin make.

Iech sjreef al ; "de Hollenders vaan us aofgesjöd" De lui die ´t fies der fieste mètgevierd höbbe vaan boete de "knótsgekke"grenze zien al weer oet zich zellevers vertrokke.

Vastelaovend viere zit in 'ne mins . Dus liere kinste dat neet . Meh mètviere, dat kin altied.'t Zit jummers in us, zoe wie ouch 't dialek in us moot zitte. En dat lètste , dao mankeert 't nog wel 'ns aon.

't Is noe misjien e good memint um ´ns stèl te stoon bij 't dialek. In " Kengkee "stijl, 't Mestreechs dialek. Kloonke de leedsjes neet geweldeg. Vaan "lepke"tot "zönneke" en alles watste dich daobij kins bedinke. Dao vèlt "zonnetje" en "lapje" toch gans bij weg. Nog meh kort geleie höb iech mich de De Nuie Mestreechsen Dictionair aongesjaf. En mèt de fiesdaog ouch kado gedoon aon mien kinder. Dao moot 't continuere vaan 't spreke en sjrieve vaan dialek jummers beginne en noets mie oetsjeie.

't Is 'nen echte aonraojer. Wäörd es ; Oethoejere, kammezaol, heujemeker, naomsjèldsje, sjrienewèrker, voeloer, sjölvere en strikke kinne veer toch gewoen gebruuke, zoonder wat veur 'n sjaol daan ouch gevolg te höbbe. Euze Vajer en Mojer gaof us die wäörd mèt dee sjoene klaank. De hoofs allein meh "op d'n wäörd te lètte" ! En dat deiste fetsoenshalve toch al..

Uitzieken, vest, hoedenmaker, naambordje, timmerman, luilak, schilferen en breien. Is dat 't daan ? Kom noe...

De Hollandse vastelaovendsleedsjes zien in de ban gedoon. Toch ouch neet veur niks. Mèt "paard in de gang"en "worstjes op je borstjes" voolte veer us toch neet ech toes. Dat geveul moot toch ouch opkoume es veer "boodsjappe "goon doen i.p.v. kemissies," geestig" zien i.p.v. geisteg, prikkeldraod ripperere i.p.v. taankelendraod, haveloos zien i.p.v. sjebbeteg en laveloos in plaots vaan zaat.

Veer höbbe e magneprachteg dialek.

13 Miert 2005 weurt alweer veur d'n derde kier 't Groet Mestreechs Diktee gehawwe. De kans veur uuch um te ervare wie 't zit mèt 't sjrieve vaan ouch eur Mestreechs. Kom neet mèt ,'t excuis ; "Hoof iech neet te perbere, kin iech toch niks vaan" Oeteindelek höb geer 't Nederlands ouch oonder eure "helm"gekrege toendertied. En 't is de meujte weerd um veur eur eige taol nog beter eur bès te doen.

Dink d'r aon , geer moot uuch wel laote insjrieve veur dat lierzaam veurlees( Jan Jansen) en sjriefeurke.

Mèt Vastelaovend kin 'n ederein ZIEN en HURE boe geer vandan komp Boerum allein mèt die daog? Laot 't de res vaan 't jaor daan in eder geval HURE ! Dat is regel ein. Regel twie is ; Sjik mèt de fiesdaog- däög sjrijf geer daan allang neet mie- dialekkaarte, in dialek door uuch besjreve. ! Sjik de kaarte,aon uuch geriech, en neet in dialek gesjreve , zoonder pardon trök. Dat d'n aofzender 't zich ouch meh aonliert.....

Astrein hure veer daan weer perceis boe ederein vaandan kump. Of dat noe Heugem , Hier, Oesj of Mariadörp is. Veer huren 't toch ouch aon d'n Amsterdammer, d'n Hagenees, d'n Tukker . Veer doen us uuterste bès um 't neet te laote huure !!!!! Koum noe.

Vaanaof noe 't hiele jaor door ;

LAOT UUCH HURE EN ZIEN IN 't DIALEK
Daan pas wete ze 't direk
Dee(zie) heet zich neet laote kinne
En sprik en sjrijf alles in Dialekzinne !!!