Gistere gebäörde 't weer. Löp 'ne jonge pa met z'n twie döchterkes door de groete Staat, kump 'ne gamin op 'ne fiets aon en veurt ei bleudsje haos 't understebove. Pa kós häör nog zjus tröktrèkke. Witheit waor 'r. En boe heer zoe gaw dee littenij vaan sjeldwäörd vaandan haolde, weet ich neet, meh 't waoren 'rs 'nen hielen houp. Sommige had ich nog noets gehuurd. De 'smalbetser' vrong zich tösse de Belsje medamme en de versjrikde toeriste door. Die lèste dachte zeker tot hei in zoe'n nette stad es Mestreech allein mer koerjunkskes en mèssedeenderkes woende. Jewel!
't Krolleköpke vaan e jaor of drei had häör teddybeerke laote valle en zat 't op e keke en sjriewe wie pa vlokentere doorleep. Dus pa drejde zich um en 't had gein haor gesjeeld of heer had 't stuur vaan 'nen andere fiets in z'ne rök gekrege, want dee jong leet z'ne fiets steigere wie e wèld peerd. En nörgens 'ne govie of 'ne stadswachter te zien. Netuurlik kinne die lui neet euveral tegeliek zien, al verwachde pa dat wel en heer neet allein want inins bemeujde zich noe zoe get ederein de met.
Sjan spraok 't volk devaan tot dit op 'ne zaoterdagmiddag kós gebäöre. Dat zou vreuger neet zien veurgekoume, toen had de jäög nog respek en fatsoen. Nou, ich dach dao 't mijnt vaan. Vreuger is noe neet en wie väöl kinder hadde toen 'ne fiets? En tegeliek dach ich aon miene pa zaoliger, wie dee in eine kier met 'ne fiets kaom aonzètte. Veer wiste neet wat veer zaoge. Nog de week daoveur had heer gezag tot 'r tot ze viefenzevetigste zou blieve chauffere, wel neet in de Kleine- en Groete Staat want die straote waore väöl te smal. Boe-op ma häöm verwoonderd vroog wat of heer dao te zeuken had en daobij, heer kós z'ne wagel toch in de Brökstraot laote stoon. Pa reageerde vrij röstig. "Jewel, meh es iéch get te zègken had, moch geinen auto of fiets door de binnestad vare."
Soms woort 't meujelik um zien redenaties oetrein te hawwe, want v'r kinden ouch z'n verhaole euver die stom vootgengers die dweers veur de rajer vaan z'ne Ford de straot euverstaoke. Morsdoed had heer ze kinne rije. Waor heerzelf daorentege te voot of met de fiets oonderweeg, en 'nen automobilis had neet veur häöm op de rem gestande, waor Mestreech te klein gewees. Ich mós dao gistere tijdens die bijnao aonvaring vaan dat meideke metein weer aon dinke en ich vroog mich aof wat pa heivaan gezag zou höbbe. Of zou heer 't noe misjien toch minder erg höbbe gevoonde, noe de binnestad jummers verkiersvrij en dus e stök röstiger en veiliger is, in vergeliek met ziene jongen tied?
Meh 't waor of ich 'm helop hoort zègke, neumstiech dat e stök röstiger en veiliger, zoe joonk dat 'n oonsjöldig keend molesteert, 'ne maan in z'ne rök veurt en 'm misjien veur ze leve invalied maak. Is 't noe nóg neet hoegtied veur e bitsje respek tegeneuver 'nen andere? Dee pa van miech. Toch had heer geliek veural wat dat respek betröf. Meh d'r zal nog wel väöl water de Maos aofgoon iertot ederein dat doorheet.

Veer bringe uuch dees stökskes mèt mètwèrking vaan mevrouw Plantaz. Veer zien gruuts dr'op tot veer touwstumming höbbe um dees stökskes op Kengkee punt nl te prezentere.

Veur mier beuk en verhaole van mevrouw Plantaz klik hei.