De stal in 't veld
Glans en glitter, zieë vaan leech en zelfs hei en dao zachte, melancholieke meziek in de winkels. De hiel stad in feesstumming, gelökkige geziechter die de spanninge vaan weke, maonde vaan zich aofsjödde. De lui koupe cadeaus, verseringe veur de keersboum, bonbons, vlaoj, tuurtjes en draank. Mörge is 't keersmes.
Op 'ne boeteweeg sleip 'ne maan met 'ne metershoege keersboum. Te groet veur de kleinen aonhaangwage. Um de boum in 't gareel te hawwe, bint heer 'm met e paar flinke touwe vas. In gedachte huurt heer de kinder thoes al juiche en sjriewe. Lia heet de doeze met belle, balle en klokke, ingelkes en slingers al klaorgezat. Ze zeet 't neet, meh ze veult de pijn vaan 't gemis vaan 't aajd stelke vaanoet häör awwershoes. Ton heet 't bij de lèste verhuizing kepot geslage. De kinder höbbe daonao nog 'n tiedsje met de beeldjes, veural de sjäöpkes en d'n os met d'n ezel gespäöld, toen zien ze op zekeren daag in de greune bak gegoejd. Vrun en kinnisse höbbe al jaore gei stelke mie, is oet d'n tied. Hun kinder wete vaan 't Keerskeend neet aof. Keersmes is veur hun 't fies vaan 't leech. Hun hiele hoes getuig daovaan. Bij Ton zien ma steit wel nog e klein stelke, zelfs met echte houte beeldsjes. Wie pa storf had ma dat jaor geine mood gehad um de does vaan de zolder te hole, en de kinder bojen 't neet aon.
Ton zèt zich in de wage en start. Nog 'n haaf eurke en heer is thoes. Meh de wage vertoent kure, gistere ouch al. Ton start opnui. Niks. En in gein velder of weeg iemand te zien. Had heer mer neet met opzat de binneweeg gepak. Op de groete kruusinge stoonte ze in de rij. Meh noe kós heer hei nog lang wachte ier iemand häöm kaom helpe. Heer kiek op z'n horloge, bij haaf veer, 't zal gaw stikduuster zien. Heer pak z'ne gsm. Lia nump neet op, ouch geine vaan de kinder. Heer loert roond um te zien of d'r kortbij 'n hoes of 'n boerderij steit. Allein in de veerte 'nen awwe stal bij e paar buim en get stroekgewas. Deep zöchtend start heer opnui, zich intösse rot prakkezerend wie hei weg te koume.
Waor heer in slaop gevalle? Druimde heer of zaog heer dee maan met z'n vrouw op 'ne pony noe werkelik? Ze lepe nao de stal touw. D'n duuster waor al gedeiltelik euver hun gevalle. Ton staok z'nen erm boete 't porteer in de huugde, wachde, zat z'n hand aon z'ne moond en reep zoe hel es 'r kós: "Hallo, hallo." De koppel reageerde neet. 't Begós te snieë. De oonmetelike velde roontelum häöm woorte stèlaon wit, ouch de drei figure die langzaam veuroet sjravelde. Maria en sint Zjozef, sjoot 't door Ton z'ne kop. Maria op 'ne pony, ze wèlle goon sjuile in dee stal, ze zien op weeg nao Bethlehem. Waor heer aon 't hallucinere, dit kós neet. Kom, opnui starte en make tot heer wegkaom. De wagel gaof geine krimp. De garage belle... dao naom geinen op, keersaovend. Heer deeg 'n ougenblik z'n ouge touw. Wie heer ze weer opedeeg keek heer in de ouge vaan de vrouw op de pony. Wied achter hun stoont de stal. De maan keek Ton vraogend aon. "Pech?"
"Jao, en dat op keersaovend."
"Es geer nog ins start, kin ich 'm wel duie,"stèlt de maan veur.
Ton kiek nao de jong vrouw, ze razelde vaan de kaw. Es de wagel 't weer deeg kós heer ze metnumme, boe ze ouch nao touw móste. "Zeet geer Maria en Zjozef?"
De maan glimlachde. "Kom, ich help uuch."
Heer raakde de wagel aon en de Fiat kaom in beweging. Ton sjrók op en zaog tot heer euver de veldweeg voor. Maria en Zjozef... Heer drejde zich um, zaog allein d'n awwe stal met de buim en 't stroekgewas.
"Jezus, God nog," stamelde Ton. Geine zal mich wèlle geluive, meh ich höb hun gezeen.
Dezelfden aovend stoont in hun kamer neve de boum e stelke met beelde vaan 't Keend, Maria en Zjozef. En einen inkelen herder.

Veer bringe uuch dees stökskes mèt mètwèrking vaan mevrouw Plantaz. Veer zien gruuts dr'op tot veer touwstumming höbbe um dees stökskes op Kengkee punt nl te prezentere.

Veur mier beuk en verhaole van mevrouw Plantaz klik hei.