Es eus awwers nog ins kóste trökkoume en zaoge wie Mestreech is veranderd. Niks mie eve te voot d'n kemissies doen en niks gaw eve nao Maussen veur e lepke stof, e kröpke slaoj bij de kruieneer neve dich en e paar kortlètte bij de slachter aon d'n euverkant. Nog noets hadde zij gehuurd vaan Blokker, C&A, en 't Kruidvat. De Hema en V&D, Henfling en Schnabel, jao die wel. En al die klein zake boevaan 'nen echte vakmaan d'n eigeneer waor. Niks gein veurrijkoste es d'ne kraon opins spatde wie 'ne wèlle, d'n lamp in de kamer 't opins neet mie deeg. Veur dat lèste gings te nao 't Wonder van Wieck. Meistal waor 't defek 'n kleinigheid die-s te volgens hun aonwijzing zelf kós oplosse. Noe is alles geperfectioneerd. Wee kump dich thoes nog helpe. Daan mós te 't al in 't groet aonpakke en wèts te ouch wat-s te betaols.
En de lui op 't platteland. Es die gein eige vervoer höbbe zien ze 'nen ermen hals. Evegood es ze dat wel höbbe, want boe laote ze hunnen auto, brommer of fiets?
Zelf gebruuk ich de wage mer zelde um nao de stad te goon. Amper euver de brök begint d'n élend al. 'n Doezenste gelök höbste es te örges e leeg plekske vins. Ederen automobilis wèlt z'ne wage zoe kort meugelik bij de zaak parkere boe heer mót zien. Gaank mer ins e groet stök koupe, 'ne stool, e paar meter vloerbedèkking. Zeet geer uuch dao al met sjörge? Datzelfde geldt ouch veur de Stadsbös, groet gepek is dao ouch taboe. Blijf niks anders euver es d'n spölle thoes te laote bezörge.
Es ich tösse de lui door sjeveer, dink ich aon de Hoegebrökstraot. Dao hadde veer in mien jäög drei bekkers, veer slachters, drei sjeunmekers, veer kruieneers, eine kleiermeker, twie iezerwinkels, eine sigare-en sigrèttewinkel, veer kaffees, eine coiffeur, ein wasserij en ein meubelzaak. En in de Rechstraot of Wiekerbrökstraot waors te ouch in e paar tèlle. En wou eine, toendertied, met z'ne wagel goon, gei probleem de kós euveral vrij parkere. Meh wieväöl lui hadde toen 'nen aoto, misjien eveväöl es noe geine höbbe.
Ich weet nog tot m'n ajdste broor ze rijbewies had wie heer good achtien waor. Meh gein dinken aon tot heer vaan pa ziene Ford moch liene um hei of dao nao touw te goon. Stèl dich veur tot 'r zich ( d'n auto) 'n deuk of 'n blöts opleep. Meh 't waor ouch oondinkbaar tot veer, kleine, dorve te vraoge: "Pa, brings te mich eve nao sjaol, 't regent zoe hel." De woors aongekeke of-s te ze zaogs vlege.
Es ich noe door de Mestreechter binnestad loup, loer ich tevergeefs nao e paar winkels vaan vreuger. Jonger lui wete neet beter of 't is altied zoe gewees. Euver 'n tiedsje wete ze al neet mie vaan Daniëls in de Kleine Staat en dee is nog gei jaor weg. Mestreech is veranderd. En daan dink ich nog neet ins aon de koms vaan de Bijekörf, 't obbenui bestraote vaan de haaf stad en versjrikkelike koule boe iers 't Belasting- en Stadskentoer höbbe gestande. Meh daan zèk ich mer wat pa altied zag: "Och, 'zal mienen tied wel dore... 't weurt toch zoondag."

Veer bringe uuch dees stökskes mèt mètwèrking vaan mevrouw Plantaz. Veer zien gruuts dr'op tot veer touwstumming höbbe um dees stökskes op Kengkee punt nl te prezentere.

Veur mier beuk en verhaole van mevrouw Plantaz klik hei.