De breurs en zusters waoren 't deze kier oonderein eins, ma mós zich neet met opzat joonk goon veurdoen. Marjon häöre vrund had op 'nen aovend opins opgemerk tot mam gans anders waor es de zijn. Heer had nogal gedrök op dat anders, boedoor 't had gekloonke esof zij ze neet mie good op 'n rij had.
Marjon vertèlde 't aon Bob dee 't doorgaof aon Gert en dee brach 't euver aon Betti. En die wou 't näödsje vaan de kous wete. En wie ze weer ins allemaol same waore, vroog ze aon dee vrund wie anders mam daan wel waor. De jong zjeneerde zich kepot en stamelde get vaan: "Nou jeh, gewoen anders, ze sprik zoe modern."
Gelökkig tot 'm dat zoe mer inveel. Gert goejde 't met 'ne kopzwej vaan zich aof. "Modern, modern. Dat woord zeet niks, is 'ne sleutel dee op eder sloot pas."
Marjon luusterde naodinkend. En rappeleerde zich wat mam lès tege pap zag. "Krieg de klere." Ierder hètde dat loup nao de hel. En gistere toen 't buurjunkske z'ne nuie voetbal kaom laote zien, reep mam oetgelaote: "Och wat good, oonwies gaaf!" Marjon had gedach tot ze dat met opzat zag veur dat menneke.
Ouch Bettie zaot in häör memorie te grejje. 't Waor häör noets zoe opgevalle tot mam op de modernen toer zaot. Meh es 'ne vreme met zoe'n opmerking kaom... vreme zien en hure miejer es de eige lui. Me weent noe eimaol aon ein.
Ze stoetde Bob aon. "Wat vins diech devaan?"
Bob zaot te prakkezere euver e veurval vaan e paar weke geleie. Mam gebruukde toen weer ins 't woord coupabel inplaots vaan capabel. Zoonder häör te wèlle pepreke zag heer: "Capabel, mam. Me is capabel um dit of dat te doen. Coupabel beteikent sjöldig zien aon get. 't Is Frans veur: "Etre coupable d'un crime." Aon 'ne misdaad sjöldig zien.
Eve leek mam vaan häör stök gebrach, toen kirde ze: "Och jeh, normalieter zèk ich ouch altied capabel, zeker wete."
Of dat noe kaom door dat stomme 'zeker wete' of door 't nog stommere normalieter, meh 't sjoot Bob gewoen in 't verkierde keelgaat. "Sjei in godsnaom oet met dat genormalieter. 't Is normáááliter. Latien blijf Latien en es te dat neet wèts, gebruuk daan 'n ander woord."
Heer sjriewde 't compleet oet, heer had ei jaor gymnasium gehad. Wat häör neet devaan trökheel um 't in 't woordebook op te zeuke. "Okee de höbs geliek." Twie daog zag ze 't good, toen waor ze 't weer vergete. Bob had 't zoe gelaote.
De vrund vaan Marjon en pap zaoten op 't terras toen pap zag: "Dink neet tot iech 't neet huur, dee nuie vocabulair vaan mam. Vemörge nog aon d'n tèllefoon... häör zuster belde op die had 't weer aon de stek met dee lekkere Willy. Mam zag: "Och laot dee zak toch stikke, dee z'ne lölkook huurs te noe al zoelang. Zèk gewoen shit en geef 'm z'ne congé."
Zoe get zou ze ierder noets gezag höbbe. Ze is inderdaod veranderd, en boedoor, ich weet 't neet. Misjien door d'n tèllevisie.
Mam kaom 't terras op met e volgelaoje deenblaad. "Aan tafel, " reep ze met twie oetroopteikes. De vrund zag: "Dat bedoel ich noe." En toen tege mam: "Kint geer mien ma neet ins get modernisere?"
Mam keek 'm serieus aon. "Gere jong, meh daan mót dien ma zich neet capabel goon make aon modern wäörd. Latien blijf Latien, zeker wete!"

Veer bringe uuch dees stökskes mèt mètwèrking vaan mevrouw Plantaz. Veer zien gruuts dr'op tot veer touwstumming höbbe um dees stökskes op Kengkee punt nl te prezentere.

Veur mier beuk en verhaole van mevrouw Plantaz klik hei.