D'n döchterke vaan daartien jaor zal dich koume vertèlle tot 't bekans twiehoonderd euro sjöld heet. Gert, 'ne kinnis vaan mich, dach iers aon flawwe köl en ging neet drop in. "Ech woer pap, ich weet neet wat ich mót doen... ich mót 't veur de volgende week trökbetaole."
Noe keek heer häör verpópzak aon en herhaolde: "Twiehoonderd euro dat is mie es veerhoonderd gölde, en boe aon, dat is toch neet meugelik."
Wendy slikde. "Jewel, meh ich wis ouch neet tot 't zoe väöl waor... get geliend veur 'ne nuie gsm, e paar cd-kes en zoe, en dat bellen oonderein dat doen alle kinder op sjaol." 't Giechelde sjaopechtig.
Toen ontplófde Gert, veural dat gegiechel staok 'm én z'n eige oonnuzelheid. Heer had noets get in de gate gehad net zoe min es Annie, z'n vrouw, anders had ze 'm wel ingeliech.
Wendy dat gehoop had met pap euverein te kinne koume, zaog tot 't sjeifleep en keekde zenewechtig: "Ander kinder höbbe noets probleme, die kriege hun abonnemint veur niks vaan hun awwers en iech mót altied alles zelf betaole, dat is gewoen neet ierlik."
Gert tèlde in z'n eige tot vijf, röstig blieve jong, röstig, ruizing los niks op.
Meh Annie waor 'm veur. "Dus dich höbs mer raak gebeld en geliend en dich dachs pap en mam betaole wel en dich wèts zeker tot de ander kinder op sjaol gein geldprobleme höbbe. Nou dat zal ich die awwers wel ins vraoge."
Wie 'ne wèlle sprong Wendy euverind. Dat noets. 't Wis hielemaol niks zeker. Meh wie koume zij daan aon 't geld.
Gert voolt zich ieskaajd weure. Dus Wendy had hun belazerd. Iergistere nog had 't gezag tot dat belle echt neet väöl kosde. Noe zag heer: "Daan geis te vaanaof vandaog wèrke veur die sjöld, vakke völle, gezètte roondbringe, maak neet oet wat, vaan us krijgs te geine roejen duit." En tege Annie: "Zoe'n wèrkstraf zal häör liere."
Wendy dach tot 't door de groond ging. Toen veel häör get in. Niels häör vrundsje, ouch zjus daartien waor lès d'n dans oontsproonge. Gans opgeluuch reep 't : "Kinder vaan miene leeftied mage gaar gei betaold werk doen. Welke baas dinks te tot tege de lamp wèlt loupe? Meh 't is al good, hajt eur cent mer ich höb genóg spaorgeld." Zoe sprik e keend dat zich geine raod wèt en meint tot e paar hoonderd eurokes op de baank 'ne riekdom is.
Gert heet de sjöld betaold. De wèrkstraf is umgezat in 't ergste vaan alles, 'n haaf jaor laank ederen daag d'n aofwas doen en d'n hoond oetlaote. "En dink mer neet tot veer 't dich haverwege kwietsjelle," zag Annie.
Had Wendy noe mer niks tege oma gezag want die brach 't verhaol in de familie, en die waor oonderling verdeild. Oma had begrip veur 't keend, 't had 't toch zelf wèllen oplosse, totdat 't mèrkde tot dat mislökde. Gert ze zuster waor hel. Die voont tot awwers neet te gaw concessies móste doen, wie z'n gat brandt... En häöre vrund zag tot wèrkstraf totaal niks veurstèlde, dao lachde de jäög um. Ze krege allemaol e bitteke geliek en oongeliek.
Wendy zelf haolde häör gram, zoe wel op sjaol es thoes. 't Woort oonoetstaonbaar en dreigde met wegloupe. En wat doen awwers daan? "Wee't wèt maag 't zègke," waor 't lèste wat Gert dreuver zag.

Veer bringe uuch dees stökskes mèt mètwèrking vaan mevrouw Plantaz. Veer zien gruuts dr'op tot veer touwstumming höbbe um dees stökskes op Kengkee punt nl te prezentere.

Veer mier beuk en verhaole van mevrouw Plantaz klik hei.